ەلدىڭ باسىم بولىگىندە جاڭبىر جاۋىپ، بۇرشاق تۇسەدى، ۇسىك جۇرەدى.
سينوپتيكتەر سەنبى، 2024 جىلدىڭ 4 مامىرى كۇنگى اۋا رايى بولجامىمەن ءبولىستى، دەپ حابارلايدى Almaty-akshamy.
بولجامعا سايكەس، ەلىمىزدىڭ وڭتۇستىك-شىعىسىندا عانا جاۋىن-شاشىنسىز اۋا رايى كۇتىلەدى.
"قازاقستاننىڭ باسىم بولىگىندە اتموسفەرالىق فرونتالدى بولىكتەردىڭ وتۋىنە بايلانىستى تۇراقسىز اۋا-رايى ساقتالادى: نايزاعاي ويناپ، جاڭبىر جاۋادى، تۇنگى ۋاقىتتا ەلىمىزدىڭ شىعىسىندا جاۋىن-شاشىن (جاڭبىر، قار) بولادى دەپ كۇتىلەدى... رەسپۋبليكامىز بويىنشا ەكپىندى جەل سيپاتى ءتان، وڭتۇستىك وڭىردە قاتتى جەل تۇرسا، سولتۇستىك-باتىس، سولتۇستىك، شىعىس وڭىرلەردە تۇمان بولادى دەپ بولجانادى. تۇندە باتىس قازاقستان وبلىسىنىڭ باتىسىندا، سولتۇستىگىندە سىناپ باعانى 3 گرادۋس سۋىقتى كورسەتىپ، ۇسىك جۇرەدى، شىعىس قازاقستان وبلىسىنىڭ شىعىسىندا، سولتۇستىك قازاقستان وبلىسىنىڭ شىعىسىندا سىناپ باعانى 2 گرادۋس سۋىقتى كورسەتىپ، توپىراق بەتىنە مۇز قاتادى دەپ كۇتىلەدى"، دەلىنگەن "قازگيدرومەت" رمك تاراتقان اقپاراتتا.
سونداي-اق، سينوپتيكتەر ماڭعىستاۋ وبلىسىنىڭ باسىم بولىگىندە، اتىراۋ ءوڭىرىنىڭ باتىسىندا، سولتۇستىگىندە، شىعىسىندا، قىزىلوردا وبلىسىنىڭ باتىسىندا، وڭتۇستىگىندە، ورتالىعىندا، قاراعاندى وبلىسىنىڭ باتىسىندا، تۇركىستان وبلىسىنىڭ سولتۇستىگىندە، اقتوبەنىڭ، اباي وبلىسىنىڭ وڭتۇستىگىندە، ۇلىتاۋ وبلىسىنىڭ شىعىسىندا، ورتالىعىندا ءورت ءقاۋپى جوعارى ەكەنىن ەسكەرتەدى.