قاتەرلى ىسىككە شالدىققاندار سانى ازايماي تۇر.
قازاقستاندا جىل سايىن 39 مىڭعا جۋىق ادام قاتەرلى ىسىككە شالدىعادى، 14 مىڭنان استام ادام قايتىس بولادى، ونكولوگيالىق ەسەپتە 200 مىڭنان استام قازاقستاندىق تۇر. قر-نىڭ ءولىم-جىتىم كورسەتكىشىندە ونكولوگيالىق اۋرۋلاردان بولاتىن ءولىم ءولىم-جىتىم قۇرىلىمىنداعى ءۇشىنشى ورىندى الىپ تۇر، دەپ حابارلايدى اlmaty-akshamy.kz قازاق ونكولوگيا جانە راديولوگيا عزي-دىڭ باسپا ءسوز قىزمەتىنە سىلتەمە جاساپ.
«2022 جىلى ءبىز ق ر ۇكىمەتىنىڭ قاۋلىسىمەن بەكىتىلگەن قازاقستان رەسپۋبليكاسىندا ونكولوگيالىق اۋرۋلارمەن كۇرەس جونىندەگى 2018-2022 جىلدارعا ارنالعان كەشەندى جوسپاردىڭ مىندەتتەرىن ىسكە اسىرۋدى اياقتادىق. كەشەندى جوسپاردىڭ ماقساتى قاتەرلى ىسىكتەردىڭ اۋىرتپالىعىن ازايتۋ بولدى. ونكولوگيالىق اۋرۋلارمەن كۇرەس جونىندەگى 2018-2022 جىلدارعا ارنالعان كەشەندى جوسپاردىڭ ءىس-شارالارىن ىسكە اسىرۋ كەزىندە قاتەرلى ىسىكتەردەن بولاتىن ءولىم-جىتىمنىڭ تومەندەۋىنىڭ وڭ ءۇردىسى بار (2018 جىلى – 100 مىڭ تۇرعىنعا شاققاندا 78،1، 14 369 جاعداي، 2022 جىلى – 100 مىڭ تۇرعىنعا شاققاندا 66،4، 13 033 جاعداي)، كورسەتكىشتىڭ 9 پايىزعا تومەندەۋى بايقالدى. ءولىم-جىتىمنىڭ تومەندەۋى بارلىق ايماقتاردا تىركەلگەن»، – دەدى ق ر دسم شتاتتان تىس باس ونكولوگى، «قازاق ونكولوگيا جانە راديولوگيا عزي» اق باسقارما ءتورايىمى ديليارا قايداروۆا الماتىداعى وتكەن بۇكىلالەمدىك قاتەرلى ىسىككە قارسى كۇرەس كۇنىنە ارنالعان باسپا ءسوز ءماسليحاتىندا.
2022 جىلى ەلىمىزدە قاتەرلى ىسىكتەرمەن سىرقاتتانۋ 100 مىڭ تۇرعىنعا شاققاندا 199،2 بولدى، بۇل دەگەندە 39 096 جاعداي، الدىنعى جىلعا قاراعاندا سىرقاتتانۋشىلىقتىڭ 4،7% – عا ءوستى.
ونكولوگيالىق اۋرۋعا شالدىعۋ بويىنشا ءبىرىنشى ورىندا ءداستۇرلى تۇردە ءسۇت بەزى وبىرى، ەكىنشى ورىندا – وكپە وبىرى، ءۇشىنشى ورىندا – كولورەكتالدى وبىر، ءتورتىنشى ورىندا – اسقازان وبىرى تۇر.
ءولىم قۇرىلىمىندا ءبىرىنشى ورىندا – وكپە وبىرى، ەكىنشى ورىندا – اسقازان وبىرى، ءۇشىنشى ورىندا – كولورەكتالدى راك، جانە ءتورتىنشى ورىندا – ءسۇت بەزى ىسىگى تۇر.
«قازىرگى ۋاقىتتا قاتەرلى ىسىك اۋرۋىن ەرتە كەزەڭدە انىقتاۋ 29 پايىزدى قۇرايدى. ياعني، ءاربىر ءۇشىنشى ناۋقاس بىزگە 0 جانە 1 وبىردىڭ ساتىلارىمەن كەلەدى، بۇل جالپى ءبىزدى قۋانتادى. جاقسى كورسەتكىش – ونكولوگيالىق اۋرۋلاردان بولاتىن ءولىم-جىتىمنىڭ تومەندەۋى. سونىمەن قاتار، بەس جىلدىق ءومىر ءسۇرۋ كورسەتكىشى جاقساردى. ءقازىر ديسپانسەرلىك ەسەپتە 200 مىڭنان استام ونكولوگيالىق ناۋقاس بولسا، ولاردىڭ 55 پايىزى 5 جىل جانە ودان دا كوپ ءومىر سۇرۋدە. بۇل - جاقسى كورسەتكىش. دەگەنمەن، بارلىق وڭىرلەردە ونكولوگيالىق اۋرۋلاردىڭ سانى ارتقان. مىسالى، 2018 جىلى بىزدە 32 مىڭعا جۋىق جاڭا قاتەرلى ىسىك اۋرۋى انىقتالسا، بيىلدىڭ وزىندە ونكولوگيالىق اۋرۋلاردىڭ 39 مىڭ جاڭا جاعدايى تىركەلدى»، – دەدى ديليارا قايداروۆا.
قر-دا ونكولوگيالىق كومەكتى جەتىلدىرۋ قازاقستان رەسپۋبليكاسىنىڭ دەنساۋلىق ساقتاۋدى دامىتۋدىڭ 2026 جىلعا دەيىنگى تۇجىرىمداماسىن ىسكە اسىرۋ شەڭبەرىندە جۇزەگە اسىرىلادى.