الماتىنىڭ دۋمان شاعىن اۋدانىنداعى سورعى ستانسياسىن رەكونسترۋكسيالاۋ 35 مىڭ تۇرعىندى ۇزدىكسىز سۋمەن قامتاماسىز ەتەدى، دەپ حابارلايدى almaty-akshamy.kz
الماتى اكىمى ەربولات دوسايەۆ جۇمىس ساپارى بارىسىندا جانە مەدەۋ اۋدانىنىڭ تۇرعىندارىمەن كەزدەسۋ كەزىندە 20 مىڭنان استام ادام تۇراتىن دۋمان شاعىن اۋدانىنداعى سۋ رەزەرۆۋارلارىن، ماگيسترالدىق سۋ قۇبىرى مەن سورعى ستانسياسىن قايتا جاڭارتۋ بارىسىن تەكسەردى. سۋمەن جابدىقتاۋ ماسەلەسى 11 جىلدان استام ۋاقىت بويى تۇرعىنداردى الاڭداتىپ كەلەدى.
مەدەۋ اۋدانىنىڭ اكىمى ەركەبۇلان ورازالين قالا باسشىسىنا اۋىز سۋ تاپشىلىعى پروبلەمالارى جانە دۋمان ش/ا اۋىز سۋمەن جابدىقتاۋدىڭ قوسىمشا كوزىن قامتاماسىز ەتۋ جونىندەگى دامۋ جوسپارلارى تۋرالى باياندادى. بۇگىنگى تاڭدا جۇمىس ىستەپ تۇرعان رەزەرۆۋارلاردىڭ وتكىزۋ قابىلەتى تاۋلىگىنە 2،6 مىڭ تەكشە مەتردى قۇرايدى. جازعى كەزەڭدە تاۋلىگىنە 2،2 مىڭ تەكشە مەتر تۇتىنۋ تاپشىلىعى بايقالادى، بۇل رەتتە كوپپاتەرلى ۇيلەردىڭ 4-5 قاباتىنا سۋ جەتپەيدى. بۇدان باسقا، شاعىن اۋدان اۋماعىندا 2025 جىلعا دەيىن پايدالانۋعا بەرىلەتىن جاڭا تۇرعىن ءۇي كەشەندەرىنىڭ قۇرىلىسى جۇرگىزىلۋدە، بۇل ءوز كەزەگىندە دۋمانداعى حالىقتىڭ ءوسىمىن 15 مىڭ ادامعا ارتتىرادى جانە سۋ تۇتىنۋدىڭ قوسىمشا تاپشىلىعىن تۋدىرۋى مۇمكىن.
الماتى اكىمى ەربولات دوسايەۆ نىساندى تەحنيكالىق تەكسەرۋدى دايىنداۋدى جەدەلدەتۋدى جانە جوبانى قۇرىلىس باسقارماسىنا جەدەل تاپسىرۋدى تاپسىردى.
«قالا تۇرعىندارىن سۋمەن قامتاماسىز ەتۋ-باستى مىندەت. ءبىز دۋمان شاعىن اۋدانىنىڭ تەز وسكەنىن بىلەمىز، بەلسەندى قۇرىلىس ءجۇرىپ جاتتى، سايكەسىنشە ينجەنەرلىك جەلىلەردىڭ قۋاتى جەتىسپەيدى، سونىڭ ىشىندە اۋىز سۋ تاپشىلىعى بار. تەحنيكالىق بايقاۋدان كەيىن بۇرىنعى نىساندى قالدىرامىز با الدە جاڭاسىن سالامىز با، ءتيىستى شەشىم قابىلدايمىز»، - دەپ اتاپ ءوتتى قالا باسشىسى.
سونداي-اق، ەربولات دوسايەۆ اۋدان اكىمىنە، قۇرىلىس جانە ەنەرگەتيكا جانە سۋمەن جابدىقتاۋ باسقارماسىنىڭ باسشىلارىنا ينجەنەرلىك كوممۋنيكاسيالاردى تۇرعىن ۇيلەرگە جەتكىزۋ بويىنشا ۇدەرىستەردى جەدەلدەتۋدى تاپسىردى.