تىركەلگەن جاعدايلاردىڭ كوبى ەۋروپادان انىقتالدى
دۇنيەجۇزىلىك دەنساۋلىق ساقتاۋ ۇيىمى (ددسۇ) 33 ەلدە 650 بالادا اۋىر گەپاتيتتىڭ انىقتالعانىن حابارلادى. بۇل گەپاتيتتىڭ ەتيولوگياسى ءالى بەلگىسىز جانە زەرتتەلىپ جاتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
اۋرۋ جۇقتىرۋ فاكتىلەرى وسى جىلدىڭ 5 ءساۋىرى مەن 26 مامىرى ارالىعىندا انىقتالدى. تىركەلگەن جاعدايلاردىڭ كوبى ەۋروپادا، 222 جاعداي ۇلىبريتانيادا انىقتالعان. ەۋرووداقتاعى جاعدايدىڭ 75%-تەن استامى بەس جاسقا دەيىنگى بالالاردا تىركەلگەنى بەلگىلى بولدى. تاعى 99 جاعداي اۋرۋ ءتۇرىن جىكتەۋدى كۇتىپ وتىر.
"وسى اۋىر گەپاتيتتىڭ ەتيولوگياسى بەلگىسىز بولىپ وتىر جانە زەرتتەۋ جۇرگىزىلىپ جاتىر. ىقتيمال قوزدىرعىشتىڭ كوزى مەن جۇعۋ جولى ءالى انىقتالعان جوق. بۇل جاعدايلار كلينيكالىق تۇرعىدان اسا اۋىر بولىپ وتىر. سونداي-اق بۇل اۋرۋ كەزىندە باۋىر جۇمىسىنىڭ جەتكىلىكسىزدىگى اسقىنۋى بايقالادى"، - دەدى ددسۇ ماماندارى.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، 650 ىقتيمال جاعدايدىڭ 38-ىندە (6%) بالاعا باۋىر ترانسپلانتاسياسى قاجەت بولسا، 9 جاعدايدا (1%) بالا قايتىس بولعان.
ساراپشىلار ازىرشە اۋرۋ قوزدىرعىش كوزى مەن جۇعۋ ادىستەرىن انىقتاي الماي وتىر. سونىمەن قاتار، دارىگەرلەر كەيبىر ناۋقاستاردا كوروناۆيرۋس نەمەسە ادەنوۆيرۋستى انىقتادى، ءبىراق بۇل دەرەكتەر ءالى تولىق ەمەس. ددسۇ الەمدىك دەڭگەيدە اۋرۋدىڭ ءقاۋپىن ورتاشا دەپ باعالاپ وتىر. وسى جاعدايلاردىڭ ىقتيمال سەبەپتەرىنە قوسىمشا جان-جاقتى ەپيدەميولوگيالىق، كلينيكالىق، زەرتحانالىق، گيستولوگيالىق جانە توكسيكولوگيالىق زەرتتەۋدى بىرنەشە ۇلتتىق ورگان، زەرتتەۋ جەلىلەرى جانە ددسۇ-داعى ءارتۇرلى جۇمىس توپتارى جانە سەرىكتەستەر جۇرگىزىپ جاتىر.
ددسۇ-داعىلار وسى اۋرۋ ءتۇرىن جۇقتىرۋ فاكتىلەرىن انىقتاۋعا، تەكسەرۋگە جانە ول تۋرالى حابارلاۋعا كەڭەس بەردى.