باعدارلاما اياسىندا ءبىلىم بەرۋ جانە دەنساۋلىق ساقتاۋ مەكەمەلەرىندە قول جۋۋعا ارنالعان ورىندار سانيتارلىق-گيگيەنالىق جابدىقتارمەن تولىق قامتاماسىز ەتىلەدى.
2025 جىلى وزبەكستاندا حالىقتىڭ سانيتارلىق جاعدايىن جاقسارتۋعا باعىتتالعان اۋقىمدى شارالار قولعا الىنىپ وتىر. پرەزيدەنت شاۆكات ميرزيەيەۆتىڭ باستاماسىمەن ەلدە «تازا قول» اتتى ارنايى باعدارلاما جۇزەگە اسىرىلادى، دەپ حابارلايدى aqshamnews.kz
upl.uzء-تىڭ مالىمەتىنشە، بۇل جوباعا 780 ميلليارد سۋم (شامامەن 64 ميلليون دوللار) كولەمىندە قارجى بولىنەدى.
باعدارلاما اياسىندا ءبىلىم بەرۋ جانە دەنساۋلىق ساقتاۋ مەكەمەلەرىندە قول جۋۋعا ارنالعان ورىندار سانيتارلىق-گيگيەنالىق جابدىقتارمەن تولىق قامتاماسىز ەتىلەدى. سونداي-اق سانيتارلىق ينفراقۇرىلىمدى جاڭعىرتۋعا باسىمدىق بەرىلمەك.
اتاپ ايتقاندا، 126 مەكتەپتە وقۋشىلارعا قولايلى جاعداي جاساۋ ءۇشىن ىشكى دارەتحانالار سالىنادى. 6 مىڭعا جۋىق بالاباقشاعا كۇن ەنەرگياسىنان قۋات الاتىن كوللەكتورلار ورناتىلادى. ال 4300 الەۋمەتتىك نىسانعا ۇزدىكسىز اۋىزسۋ جەتكىزۋ ماقساتىندا سۋ ساقتايتىن رەزەرۆۋارلار قويىلادى.
«تازا قول» باعدارلاماسىنىڭ تاعى ءبىر ماڭىزدى باعىتى — تۇرعىنداردىڭ جەكە گيگيەنا تالاپتارىن ساقتاۋ ماڭىزدىلىعى جونىندە اقپاراتتاندىرۋ جۇمىستارى. دارىگەر مامانداردىڭ ايتۋىنشا، قاراپايىم گيگيەنالىق ەرەجەلەردى ساقتاۋ ارقىلى جۇقپالى اۋرۋلاردىڭ 35–40 پايىزىن الدىن الۋعا بولادى.
بۇل باستاما وزبەكستاندا قوعامدىق دەنساۋلىقتى نىعايتۋعا جانە وسكەلەڭ ۇرپاققا تازالىق مادەنيەتىن ۇيرەتۋگە باعىتتالعان ماڭىزدى قادام بولماق.