كەزەكتە تۇرعانداردىڭ ەكىنشى لەگىنە الماتىداعى پاتەر كىلتى تابىستالدى.
الماتىدا ءۇي كەزەگىندە تۇرعان حالقىنىڭ الەۋمەتتىك وسال توبىنا جاتاتىن ەكىنشى لەكتىڭ 164 تۇرعىنىنا جالدامالى پاتەردىڭ كىلتى تابىستالدى، دەپ حابارلايدى Almaty-akshamy.kz.
ەستەرىڭىزگە سالا كەتەيىك، بىرەر كۇن بۇرىن ءحاوت ساناتىنداعى كەزەكتە تۇرعان 124 ادامعا پاتەر كىلتى تابىستالدى. 124 پاتەردىڭ 49-ى ءبىر بولمەلى، 75ء-ى ەكى بولمەلى.
باسپانالى بولعان جانداردى الماتى قالاسى كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى عالىمجان ابدىشۇكىر ۇلى قۇتتىقتاپ، جالدامالى پاتەرلەر قالانىڭ كوممۋنالدىق تۇرعىن ءۇي قورىنان بولىنگەنىن حابارلادى.
«ءۇي كەزەگىندە تۇرعان 164 ادام حالىقتىڭ الەۋمەتتىك وسال توبىنا جاتادى. بۇل جەتىم بالالار، I جانە II توپتاعى مۇگەدەكتەر، مۇگەدەك بالالاردى تاربيەلەپ وتىرعان وتباسىلار، زەينەتكەرلەر، تولىق ەمەس وتباسىلار. ولار اي سايىن پاتەردىڭ جالداۋ اقىسىن تولەيدى. ءبىر بولمەلى پاتەردى جالعا الۋ قۇنى شامامەن 10 مىڭ تەڭگە، ەكى بولمەلى پاتەرگە شامامەن 15.000 تەڭگە كەرەك. كوممۋنالدىق قىزمەتكە اي سايىن اقى تولەۋ قاجەت. باعدارلامانىڭ شارتى بويىنشا ازاماتتارعا پاتەردى جالعا بەرۋگە نەمەسە قايتا جوسپارلاۋعا تىيىم سالىنادى»، - دەدى ول.
پاتەر كىلتىن العان ەكى بالانىڭ اناسى الماتىلىق داريعا ماقاجانوۆا ءومىر بويى 10 شارشى مەتر جاتاقحانادا اپكەسىمەن بىرگە تۇرعان ەكەن.
«مەنىڭ ەكى بالام بار. قىزىم ارۋجان مۇگەدەك. 2012 جىلى مەن حقكو-عا بارىپ، كەزەككە تۇردىم. ءقازىر اپكەممەن جانە بالالارىممەن ءبىر بولمەدە تۇرامىن. وتە تار، كەيدە ارامىزدا تۇسىنىسپەستىك تە تۋادى. پاتەر كىلتى بەرىلگەنىن ەستىگەندە، جىلادىم، سەنبەدىم. بىزگە ەكى بولمەلى پاتەر بەرىلدى»، - دەدى ول.
ون جىلدان استام ۋاقىت بويى تۇرعىن ۇيگە كەزەگىندە تۇرعان ءاليا بەجانوۆا دا پاتەر كىلتىن الىپ، باسپانالى بولدى.
«ەكى بالاممەن بىرگە تالاي جىل كەزەككە تۇردىم. ءبىز ءقازىر قالا سىرتىندا 120 مىڭ تەڭگەگە پاتەر جالداپ تۇرامىز. بىزگە قوڭىراۋ شالىپ، پاتەر تۋرالى ايتقان كەزدە سەنبەدىك. باسىندا الاياقتار دەپ ويلادىق. كوپتەن كۇتكەن پاتەرىمىز ءۇشىن الماتى قالاسىنىڭ اكىمدىگىنە راحمەت ايتامىز! ءالى كۇنگە دەيىن قۋانىشتان جىلاپ ءجۇرمىن»، - دەدى ول.