ەسكەرتكىش ماقات كەنتىندە قويىلعان
اتىراۋ وبلىسىندا مايداننان ۇلىن كۇتكەن اناعا ەسكەرتكىش ورناتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ماقات اۋدانىنىڭ ورتالىعى – ماقات كەنتىندە بوي كوتەرگەن ەسكەرتكىشتە ەكىنشى دۇنيەجۇزىلىك سوعىسقا اتتانعان جالعىز ۇلىن 30 جىل بويى – سوڭعى دەمى قالعانشا كۇتكەن ءساندى دەڭگەلباي قىزىنىڭ بەينەسى سومدالعان.
«وتكەنسىز بولاشاق جوق. توعىز جولدىڭ تورابىنا ورنالاسقان ماقات كەنتىندە «بوزداعىن كۇتكەن انا» ەسكەرتكىشىن ورناتۋدىڭ وزىندىك ءمانى بار. بۇل ەسكەرتكىش – مايداننان ورالماعان جالعىزىنىڭ جولىن توسقان، جاقسى حابار كۇتۋمەن دۇنيەدەن ۇمىتپەن وتكەن انا رۋحىنا تاعزىمنىڭ كورىنىسى. وسى ەسكەرتكىشتەن انانىڭ قايتپاس قايسارلىعى مەن رۋحىنىڭ مىقتىلىعىن بايقاۋعا بولادى» -دەدى وبلىس اكىمى ماحامبەت دوسمۇحامبەتوۆ.
ماقات كەنتىندەگى تەمىرجول ۆوكزالىنىڭ الدىنا قويىلعان ەسكەرتكىشتىڭ بيىكتىگى – 4 مەتر. ەسكەرتكىشتىڭ ورناتىلۋىنا دەمەۋشىلەر قارجىلاي كومەك بەرگەن.
ەسكە سالا كەتەلىك، بۇعان دەيىن اتىراۋ وبلىسىندا اينالما جول اشىلعانىن حابارلاعان ەدىك.