جىل باسىنان بەرى 9 مىڭعا جۋىق ادام «قانداس» اتانعان.
مينيسترلىك ءۇش مىڭ ادامعا "قانداس" مارتەبەسىن بەرۋدەن باس تارتتى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
قانداس مارتەبەسى ءوتىنىش بەرۋشى شەشىمدە كورسەتىلگەن قونىستانۋ ايماعىنا كەلگەن كۇنى عانا كۇشىنە ەنەدى. 2017-2023 جىلدار ارالىعىندا ەلىمىزدىڭ سولتۇستىك جانە ورتالىق وڭىرلەرىنە 10،9 مىڭ قانداس قونىس اۋداردى. مينيسترلىكتىڭ تالداۋى بويىنشا، قانداستار مەن قونىس اۋدارۋشىلاردىڭ شامامەن 85% - ى قونىستانۋ ايماقتارىندا تۇرادى، 15% - ى باسقا ايماقتارعا كەتكەن.
«مينيسترلىك سونىمەن قاتار وسى جىلدىڭ التى ايىندا 3287 ءوتىنىش بويىنشا قانداس مارتەبەسىن بەرۋدەن باس تارتىلعانىن حابارلادى. باس تارتۋدىڭ نەگىزگى سەبەبى – قۇجاتتاردىڭ تولىق بولماۋى. بۇل رەتتە ءوتىنىش بەرۋشىلەردىڭ كوپشىلىگى ەسكەرتۋلەردى تۇزەتسە، قۇجات قايتا قارالادى»،-دەلىنگەن حابارلامادا.
ىشكى ىستەر مينيسترلىگى قانداس مارتەبەسىن العان ەلدەن كەتكەن ازاماتتاردىڭ جەكە ەسەبىن جۇرگىزبەيتىنىن اتاپ ءوتتى.
2023 جىلى پيلوتتىق رەجيمدە قازاقستان ەلشىلىكتەرى ارقىلى "ءبىر تەرەزە" قاعيداتى بويىنشا قانداس مارتەبەسىن بەرۋ تەتىگى جۇمىس ىستەي باستادى. ونىڭ شەڭبەرىندە ەلگە بارۋ، جۇمىس ورنى، تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. بۇگىنگى تاڭدا رەسپۋبليكانىڭ شەت ەلدەردەگى مەكەمەلەرى ارقىلى جاڭا فورماتتا ەتنيكالىق قازاقتاردان 9 569 ءوتىنىش (656 وتباسى) قابىلداندى.
1991 جىلدان باستاپ قازاقستانعا بارلىعى 1 ملن 135،7 مىڭ ەتنيكالىق قازاق ورالعان.