مۇنداي ۇسىنىستى قارجى نارىعىن رەتتەۋ جانە دامىتۋ اگەنتتىگى جاساپ وتىر.
ەگەر ۇسىنىس ماقۇلدانسا، بانك الدىنداعى قارىزىن 90 كۇننەن اسا تولەمەگەن ازاماتتارعا نەسيە بەرىلمەۋى مۇمكىن، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
«بانكتىك قارىز نەمەسە ميكروكرەديت بويىنشا مەرزىمى وتكەن بەرەشەگى كۇنتىزبەلىك 90 كۇننەن اساتىن جەكە تۇلعاعا كاسىپكەرلىك قىزمەتتى جۇزەگە اسىرۋعا بايلانىستى ەمەس بانكتىك قارىز بەرۋگە تىيىم سالىنادى»، - دەپ جازىلعان «اشىق» نقا پورتالىندا جاريالانعان جوبادا.
مۇنداي باستاما قازاقستاندىقتاردىڭ كوپ قارىزدانۋىنىڭ الدىن الۋعا باعىتتالعان دەپ تۇسىندىرەدى اگەنتتىك.
«ازاماتتاردىڭ بورىشتىق جۇكتەمەسىنىڭ ودان ءارى ءوسۋ تاۋەكەلدەرىن بولدىرماۋ ءۇشىن ەكىنشى دەڭگەيدەگى بانكتەردىڭ، سونداي-اق ميكروقارجى قىزمەتىن جۇزەگە اسىراتىن ۇيىمداردىڭ قارىزدارى بويىنشا مەرزىمى وتكەن بەرەشەگى 90 كۇننەن اساتىن تۇلعالارعا تۇتىنۋ قارىزدارىن بەرۋدى شەكتەۋ ۇسىنىلادى. بۇل رەتتە پروبلەمالىق بەرەشەكتىڭ ءوسۋىن شەكتەۋ جانە قولدانىستاعى قارىزدار بويىنشا قارىز الۋشىلاردىڭ بورىشتىق جۇكتەمەسىن تومەندەتۋ ماقساتىندا قارىز الۋشىلاردىڭ بەرەشەكتى قايتا قارجىلاندىرۋعا، ونىڭ ىشىندە نەعۇرلىم ءتيىمدى شارتتاردا قۇقىعىن ساقتاۋ قاجەت»، - دەلىنگەن قۇجاتتا.