دەنساۋلىق - زور بايلىق
جىل سايىن بۇكىل الەمدە 29 قازاندا دۇنيەجۇزىلىك ينسۋلتپەن كۇرەس كۇنى (World Stroke Day) اتاپ وتىلەدى. بۇل كۇندى 2006 جىلى ينسۋلتپەن كۇرەس جونىندەگى دۇنيەجۇزىلىك ۇيىم وسى اۋرۋعا قارسى بۇكىلالەمدىك كۇرەستە جەدەل بەلسەندى ارەكەتتەرگە شاقىرۋ ماقساتىندا بەكىتتى.
الايدا بۇگىن اتالىپ وتەتىن كۇننىڭ تاريحى 2004 جىلدان باستالادى. ول كەزدە دۇنيەجۇزىلىك دەنساۋلىق ساقتاۋ ۇيىمى ينسۋلتتى جاھاندىق ەپيدەميا دەپ جاريالاپ، 2006 جىلى ينسۋلتپەن كۇرەس جونىندەگى دۇنيەجۇزىلىك ۇيىم قۇرىلىپ، وسى كۇندى بەكىتتى.
بۇگىندە بۇل ۇيىمنىڭ قۇرامىندا 85 ەلدەن 3،5 مىڭنان استام جەكە مۇشەسى مەن 60-تان استام ۇيىم بار. بۇل ينسۋلتپەن كۇرەس جونىندەگى عىلىمي ۇيىمدار مەن قوعامداستىقتار.
ينسۋلت - ارتەريانىڭ بىتەلۋى نەمەسە تامىر قابىرعاسىنىڭ جارىلۋى ارقىلى قان توگىلۋى سالدارىنان ميعا قاننىڭ كەلۋىنىڭ توقتاۋى ناتيجەسىندە جۇيكە جاسۋشالارىنىڭ زاقىمدانۋى نەمەسە ءولۋى؛ بۇل ميداعى قان اينالىمىنىڭ تەز بۇزىلۋىنا ءارى مي ءتىنىنىڭ زاقىمدانۋى جانە ونىڭ فۋنكسياسىنىڭ بۇزىلۋىنا اكەلەدى.
ءينسۋلتتى قوزدىراتىن فاكتورلار - جوعارى قان قىسىمى، قانت ديابەتى، حولەستەريننىڭ كوبەيۋى، سەمىزدىك، فيزيكالىق بەلسەندىلىكتىڭ بولماۋى، تەمەكى شەگۋ جانە الكوگولدى شامادان تىس تۇتىنۋ.
بۇل اۋرۋ الەمدە ءولىم مەن مۇگەدەكتىكتىڭ باستى سەبەپتەرىنىڭ ءبىرى بولىپ وتىر. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، بۇكىل الەمدە جىلىنا 6،7 ميلليون ادام ينسۋلت سالدارىنان قايتىس بولادى. قان تامىرلارى اۋرۋلارى ءولىمنىڭ جارتىسىنان كوبىن قۇرايدى، ەگەر بۇعان دەيىن ينسۋلت نەگىزىنەن 55-60 جاستان اسقان ناۋقاستاردا كەزدەسسە، قازىرگى ۋاقىتتا وسى اۋرۋعا قاتىستى جاعدايلاردىڭ ۇشتەن ءبىرى ەڭبەككە قابىلەتتى جاستاعى ادامدارعا (25-50 جاس) تيەسىلى ەكەن. دەمەك، اۋرۋ جاسارىپ كەلەدى.
دەنساۋلىق – زور بايلىق. بايلىقتى باعالاپ، كۇتە بىلگەن ءجون. اۋرۋدىڭ الدىن الىپ، دەننىڭ ساۋلىعىن ساقتايىق، سپورتپەن شۇعىلدانايىق! اۋىرىپ ەم ىزدەگەنشە، اۋىرماۋدىڭ جولىن قارايىق!