بۇگىن ءماجىلىستىڭ جالپى وتىرىسى وتەدى. وندا دەپۋتاتتار اسا ماڭىزدى ءبىرقاتار زاڭ جوباسىن قاراۋدى جوسپارلاپ وتىر، دەپ حابارلايدى Aqshamnews.kz.
وتىرىستا مەديسينا قىزمەتكەرلەرىنە فيزيكالىق زورلىق-زومبىلىق پەن قاتىگەزدىك كورسەتكەنى ءۇشىن جازانى قاتاڭداتۋ جونىندەگى پرەزيدەنت تاپسىرماسىن ورىنداۋعا باعىتتالعان دەپۋتاتتاردىڭ تۇزەتۋلەرى تالقىلانباق.
"ق ر قىلمىستىق كودەكسىنە جانە ق ر قىلمىستىق-پروسەستىك كودەكسىنە تولىقتىرۋلار ەنگىزۋ تۋرالى" زاڭ جوباسى ءماجىلىس قاراۋىنا 21 قاراشادا تۇسكەن بولاتىن. سول كەزدە جۇمىس توبىنىڭ جەتەكشىسى، دەپۋتات اسحات ايماعامبەتوۆ بۇل ماڭىزدى زاڭ جوباسى دارىگەرلەر مەن مەديسينا قىزمەتكەرلەرىن قورعاۋعا ارنالعانىن اتاپ وتكەن ەدى.
"مەديسينا وكىلدەرىنە قاتىستى زورلىق-زومبىلىق ءۇشىن جازانى ايتارلىقتاي قاتاڭداتۋ جونىندەگى ناقتى نورمالاردى ۇسىندىق. سوڭعى جىلدارى مۇنداي جاعدايلار كوبەيىپ بارادى. ءبىر دارىگەر جۇمىس ورنىندا سوققىعا جىعىلسا، تاعى ءبىرى جەدەل جاردەم شاقىرعان ۇيدە قورلىق كوردى. وسىنداي كورىنىستەرگە جول بەرۋگە بولمايدى"، - دەدى دەپۋتات.
اسحات ايماعامبەتوۆتىڭ ايتۋىنشا، بۇل باستامانى دارىگەرلەرگە جاسالعان شابۋىلداردىڭ جيىلەۋى تۋىنداتقان. سوڭعى بەس جىلدا رەسمي ستاتيستيكا بويىنشا 280 جاعداي تىركەلگەن. زاڭ جوباسىنىڭ ماقساتى تەك مەديسينا قىزمەتكەرلەرىن عانا ەمەس، پاسيەنتتەردىڭ ءوزىن دە قورعاۋعا باعىتتالعان. سەبەبى قورعانسىز دارىگەر ساپالى كومەك كورسەتە المايدى، ال ونىڭ سالدارىنان ەڭ الدىمەن قاراپايىم حالىق زارداپ شەگەدى.