600 مىڭنان استام ازامات زەينەتاقى جيناعىن قولدانا وتىرىپ، باسپانا ماسەلەسىن شەشتى
بۇل تۋرالى «وتباسى بانك» اق-نىڭ باسقارما ءتوراعاسى ءلاززات يبراگيموۆا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«20 مامىرداعى مالىمەتكە سايكەس، 273 396 ادام زەينەتاقى قورىنداعى جيناقتى قولدانا وتىرىپ تۇرعىن ءۇي ساتىپ الدى. 169 158 ادام زەينەتاقى جيناعىن «وتباسى بانكىندەگى» دەپوزيتىنە اۋداردى. اتالعان ازاماتتار دەپوزيتتى ودان ءارى تولتىرا وتىرىپ، الداعى ۋاقىتتا باسپاناعا قول جەتكىزبەك. سونىمەن قاتار 90 880 كليەنت يپوتەكالىق زايمدارىن تولىقتاي نەمەسە جەكەلەي وتەدى. بۇل ساناتتاعى ازاماتتار دا بەرەشەگىن زەينەتاقى جيناعىنىڭ كومەگىمەن وتەپ وتىر»، - دەدى ءلاززات يبراگيموۆا ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
جوعارىدا اتالعان مالىمەتتەر تەك «وتباسى بانكىنە» قاتىستى.
«ودان بولەك، 52 651 قازاقستاندىق ءبىزدىڭ بانك ارقىلى باسقا بانكتەردەگى تۇرعىن ءۇي يپوتەكاسىن مەرزىمىنەن بۇرىن نەمەسە جەكەلەي جاپتى. ءبىز بارلىق بانكپەن كەلىسىمگە قول قويعانبىز. وسىلايشا 600 مىڭنان استام ازامات زەينەتاقى جيناعىن قولدانا وتىرىپ، باسپانا ماسەلەسىن شەشتى»، - دەيدى ول.
بۇعان دەيىن اتالعان ۆەدومستۆو باسشىسى 3 مىڭ قازاقستاندىققا جالدامالى باسپانا ءۇشىن سۋبسيديا بەرۋ ماقۇلدانعانىن ايتتى. بۇگىندە ەلىمىزدە 608 مىڭنان استام ازامات باسپاناعا مۇقتاج.