بۇگىن – دۇنيەجۇزىلىك برونح دەمىكپەسى كۇنى
11 جەلتوقساندا دۇنيەجۇزىلىك دەمىكپەمەن كۇرەسۋ كۇنى اتاپ وتىلەدى. بۇل كۇننىڭ باستى مىندەتى – اۋرۋ جانە ونى باقىلاۋ ادىستەرى تۋرالى حاباردار بولۋ، دەمىكپەنىڭ بەلگىلەرى تۋرالى ءبىلۋدى ناسيحاتتاۋ، ەمدەۋدىڭ جاڭا تاسىلدەرىن ايتۋ، پاسيەنتتەردى دارى-دارمەكتەر مەن ينگالياتورلاردى دۇرىس قولدانۋعا ۇيرەتۋ، اۋرۋدىڭ الدىن الۋدىڭ ماڭىزدىلىعىنا، تريگگەرلەرمەن كۇرەسۋگە جانە اۋا ساپاسىن جاقسارتۋعا باسا نازار اۋدارۋ.
برونح دەمىكپەسى – تىنىس الۋ جولدارىنىڭ سوزىلمالى قابىنۋ اۋرۋى. ول ءارتۇرلى تىتىركەندىرگىشتەرگە جوعارى سەزىمتالدىعىمەن سيپاتتالادى. نەگىزگى بەلگىلەرى: ەنتىگۋ، جوتەل (كوبىنەسە تۇنگى)، كەۋدە قۋىسىنىڭ قىسىلۋ سەزىمى، سىرىلدار نەمەسە ىسقىرىقتار.
دەمىكپەنىڭ سەبەپتەرى ءارتۇرلى، ولار:
- گەنەتيكالىق بەيىمدىلىك؛
- اللەرگيالىق رەاكسيالار؛
- لاستانعان اۋا مەن توكسيندەردىڭ اسەرى؛
- ۆيرۋستىق ينفەكسيالار؛
- سترەسس جانە فيزيكالىق بەلسەندىلىك.
«دەمىكپە بالالىق شاقتا دا، ەرەسەك جاستا دا بولۋى مۇمكىن. بۇل ەكولوگياسى ناشار نەمەسە اللەرگەندەردىڭ اسەرىنە ۇشىراعان ادامداردا ءجيى كەزدەسەدى. دەمىكپەنى ەمدەۋ تىنىس الۋ جولدارىنىڭ قابىنۋىن ازايتۋعا جانە ءورشۋدىڭ الدىن الۋعا باعىتتالعان. نەگىزگى تاسىلدەرى: ينگالياسيالىق گليۋكوكورتيكوستەرويدتاردى قولدانۋ؛ سيمپتومداردى تەز جەڭىلدەتۋ ءۇشىن برونحوليتيكتەردى قولدانۋ؛ اللەرگەندەر مەن تريگگەرلەردەن اۋلاق بولۋ؛ پيكفلوۋمەترلەردىڭ كومەگىمەن جاعدايدى ۇنەمى باقىلاۋدا ۇستاۋ. بۇل جاعدايدا سالاۋاتتى ءومىر سالتى ماڭىزدى ءرول اتقارادى: دۇرىس تاماقتانۋ، فيزيكالىق بەلسەندىلىك كەرەك جانە تەمەكى شەگۋدەن باس تارتقان دۇرىس»، – دەيدى كارديولوگيا جانە ىشكى اۋرۋلار عزي رەسپۋبليكالىق اللەرگولوگيا ورتالىعىنىڭ باسشىسى اراي باتىربايەۆا.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا، الەمدە 262 ميلليوننان استام ادام دەمىكپەمەن ءومىر سۇرەدى جانە جىل سايىن بۇل اۋرۋدان 455 مىڭعا جۋىق ادام كوز جۇمادى. بۇل ستاتيستيكا ايماققا، ەكونوميكالىق دامۋ دەڭگەيىنە جانە قورشاعان ورتا جاعدايىنا بايلانىستى وزگەرىپ وتىرادى.
دۇنيەجۇزىلىك دەمىكپەمەن كۇرەس كۇنى بۇل اۋرۋدى، دۇرىس قاراعان جاعدايدا باقىلاۋدا ۇستاۋعا بولاتىندىعى تۋرالى ەسكە سالادى. دەمىكپە تولىققاندى ءومىر سۇرۋگە كەدەرگى بولماۋى كەرەك جانە بۇعان مەملەكەتتەردىڭ، مەديسينالىق ۇيىمداردىڭ جانە پاسيەنتتەردىڭ كۇش-جىگەرىن بىرىكتىرۋ ارقىلى قول جەتكىزۋگە بولادى.