جىل سايىن 180 ەلدەن ميلليونداعان ادامدار ءبىر ساعاتقا شامدار مەن ەلەكتر قۇرىلعىلارىن وشىرەدى.
ەلوردانىڭ كوپتەگەن نىساندارى «جەر ساعاتى» اكسياسى اياسىندا سىرتقى ساندىك جارىقتاندىرۋدى وشىرەدى. جەر شارىنداعى «جەر ساعاتى» اتتى ەڭ ءىرى اكسيا بيىل 26 ناۋرىزدا جەرگىلىكتى ۋاقىت بويىنشا 19.30-20.30 ارالىعىندا وتەدى، دەپ حابارلايدى Almaty-akshamy.kz Elorda.info-عا سىلتەمە جاساپ.
اكسيانىڭ نەگىزگى ماقساتى – ادامداردىڭ نازارىن جەر شارىنىڭ رەسۋرستارىنا جاۋاپتى جانە ۇقىپتى قاراۋعا اۋدارۋ. بۇل دۇنيەجۇزىلىك جابايى تابيعات قورىنىڭ (WWF) عالامدىق اكسياسى جانە دە بۇل تابيعاتقا ۇقىپتى قاراۋدىڭ، پلانەتامىزدىڭ شەكتەۋلى رەسۋرستارىنا قامقورلىق جاساۋدىڭ سيمۆولى. جىل سايىن 180 ەلدەن ميلليونداعان ادامدار ءبىر ساعاتقا شامدار مەن ەلەكتر قۇرىلعىلارىن وشىرەدى.
الەمنىڭ مىڭداعان ساۋلەت ەسكەرتكىشتەرى اكسياعا ءۇن قوسىپ جارىقتاندىرۋدى وشىرەدى. ولاردىڭ ىشىندە: ەيفەل مۇناراسى، بيگ بەن، كوليزەي بار.
قازاقستان دا «جەر ساعاتى» اكسياسىنا قاتىسىپ كەلەدى. ەگەر بۇرىن بۇل ناۋقاندى تەك ءىرى قالالار قولداسا، ال بيىل ءۇشىنشى جىل قاتارىنان ەلىمىزدىڭ بارلىق وڭىرلەرى اكسياعا قوسىلادى.
جەرگىلىكتى ۋاقىت بويىنشا ساعات 20.30-دا ەلوردادا نىسانداردىڭ سىرتقى ساندىك جارىعى وشىرىلەدى.
ەلوردا تۇرعىندارى مەن قوناقتارىن 26 ناۋرىزدا ساعات 19.30-دان باستاپ Mega silk way سوو-دا وتەتىن وفلاين ءىس-شاراعا قاتىسۋعا شاقىرامىز.
قاتىسۋشىلار ءۇشىن ۆيكتورينا ۇيىمداستىرىلادى. ەڭ بەلسەندى قاتىسۋشىلار «Stopmusor» الەۋمەتتىك جوباسىنىڭ ارنايى سىيلىقتارىنا يە بولادى.