امەريكالىق Pew Research Center زەرتتەۋ ورتالىعى مۇسىلمانداردىڭ الەمدەگى ەڭ جىلدام ءوسىپ كەلە جاتقان ءدىني توپ ەكەنىن مالىمدەدى.
كۇللى الەم بويىنشا مۇسىلمان قاراسى 2010 جىلدان 2020 جىلعا دەيىن 347 ميلليون ادامعا ارتقان، دەپ حابارلايدى aqshamnews.kz.
اتالمىش ۇيىم 2700 دەرەك كوزدەن الىنعان (حالىق ساناعى، رەسمي جازبالار جانە 2010 جىلدان 2020 جىلعا دەيىن 201 ەلدە جۇرگىزىلگەن الەۋمەتتىك ساۋالنامالار) مالىمەتتەردى تالداي كەلە ءوز ەسەبىن جاريالادى. بۇل مالىمەتتە، سونداي-اق، ساۋالناماعا تارتىلعانداردىڭ ءدىني سەنىمى تۋرالى سۇراقتارعا بەرگەن جاۋاپتارى دا ەسكەرىلگەن. ەسەپكە سايكەس الەمدە مۇسىلماندار سانى 347 ميلليون ادامعا ارتتى، بۇل كورسەتكىش بارلىق دىندەر اراسىندا ەڭ جىلدام ءوسىمدى بىلدىرەتىن كورسەتكىش. بۇعان نەگىزىنەن يسلام قوعامىنداعى مۇسىلمان ەلدەرىنىڭ تابيعي جولمەن ءوسۋى سەبەپ بولدى. سالىستىرۋ ءۇشىن سالساق، حريستياندار سانى 122 ميلليون ادامعا ارتقان، الايدا، ولاردىڭ الەم بويىنشا ۇلەسى ازايىپ كەلەدى. ەسەپتە حريستيانداردىڭ ۇلەسىنىڭ 1،8% -عا تومەندەۋى نەگىزىندە حريستيانداردىڭ ءوز سەنىمدەرىنەن باس تارتۋىمەن بايلانىستى ەكەنى ايتىلعان.
وسىلايشا، مۇسىلمانداردىڭ ادامزات سانىنداعى ۇلەسى 2010 جىلى 23،9%-دان 2020 جىلى 25،6%-عا ءوستى، ال حريستيان ۇلەسى بۇل ارالىقتا 30،6%-دان 28،8%-عا تومەندەدى. حريستياندار سانىنىڭ ەڭ كوپ تومەندەۋى ەۋروپا مەن سولتۇستىك امەريكادا ورىن العان. ەسەپتە مۇسىلمانداردىڭ نەگىزىنەن ازيا، تىنىق مۇحيتى ايماعى، تاياۋ شىعىس جانە سولتۇستىك افريكادا تۇراتىنى كورسەتىلگەن. سونىمەن قاتار، سولتۇستىك امەريكادا مۇسىلماندار سانى 52،3%-عا، ساحارادان وڭتۇستىك قاراي افريكا ەلدەرىندە 33،8%-عا، تاياۋ شىعىس پەن سولتۇستىك افريكادا 23،9%-عا ارتتى. بۇل مەرزىمدە سولتۇستىك امەريكادا حريستياندار سانى 10،8%-عا، ەۋروپادا 8،8%-عا قىسقاردى، ەسەسىنە ساحارا ءشولىنىڭ وڭتۇستىگىن جايلاعان افريكا ەلدەرىندە 31،2%-عا ءوستى. ال اتەيستەرگە كەلسەك، بۇل ساناتتاعى ادامدار ادامزاتتىڭ 24،2%-ن قۇراپ، حريستيان جانە مۇسىلمانداردان كەيىنگى ءۇشىنشى كوپشىلىك توپتى قۇراپ وتىر.
بۇدان وزگە، ەسەپتە 2020 جىلى بۋدديستەر سانى 2010 جىلمەن سالىستىرعاندا 19 ميلليونعا ازايعانى، ال ەۆرەيلەر سانى 6%-عا ارتىپ، شامامەن 15 ميلليون ادامعا جەتكەنى ايتىلعان. Pew Research 2017 جىلعى زەرتتەۋ ناتيجەسىندە يسلام الەمدەگى ەڭ جىلدام وسەتىن ءدىن ەكەنى جانە 2075 جىلعا دەيىن يسلام الەمدەگى ەڭ ءىرى دىنگە اينالۋى مۇمكىن ەكەنى بولجانعان.