«ەڭبەك رەسۋرستارىن دامىتۋ ورتالىعى» اق (بۇدان ءارى – ەردو) ساراپشىلارى دايىنداعان 2050 جىلعا دەيىنگى دەموگرافيالىق بولجامعا سايكەس ەداۋىر ىقتيمال سەنارييدە 2026 جىلعا قاراي قازاقستاندا جۇمىس كۇشىنىڭ سانى 9،5 ملن ادام دەڭگەيىندە تۇراقتانادى، 2028 جىلدان باستاپ بەلسەندى وسە باستايدى جانە 2050 جىلعا قاراي 12 ملن ادامعا جەتەدى، دەپ حابارلايدى اlmaty-akshamy.kz.
«2027 جىلعا دەيىن جۇمىس كۇشىنىڭ كورسەتكىشى وبەكتيۆتى فاكتورلارعا بايلانىستى از نەمەسە مۇلدەم وسپەيدى دەپ كۇتىلۋدە. بىزدە جۇمىس كۇشىنىڭ ازدى-كوپتى بەلسەندى ءوسۋى شامامەن 2028 جىلدان باستالادى دەپ كۇتىلۋدە. 2031 جىلعا قاراي ءبىز 10 ميلليون ادامعا، 2040 جىلعا – 11 ميلليونعا جاقىندايمىز. وسىلايشا، جۇمىس كۇشى جىلىنا شامامەن 100 مىڭ ادامعا وسەدى. 2050 جىلعا قاراي ءبىز 12 ملن ادامنان تۇراتىن دەڭگەيگە جەتەمىز، بۇل 2023 جىلمەن سالىستىرعاندا (9،256 ملن) ءوسىم 28%-دى قۇرايدى»، – دەدى ەردو بولجاۋ جانە زەرتتەۋ دەپارتامەنتىنىڭ ديرەكتورى دميتريي شۋمەكوۆ.
وڭىرلەر بولىنىسىندە ءبىرىنشى كەزەكتە مەگاپوليستەردە، ونىڭ ىشىندە استانادا جۇمىس كۇشى سانىنىڭ ءوسىمى كۇتىلۋدە، وندا 2050 جىلعا قاراي ءوسىم 2،4 ەسە بولۋى مۇمكىن. الماتىدا جۇمىس كۇشى ءىس جۇزىندە ەكى ەسەگە ارتادى، ماڭعىستاۋ جانە الماتى وبلىستارىندا ونىڭ سانى 80 %-عا وسەدى.
«بۇل رەتتە سولتۇستىك قازاقستان وبلىسىندا جۇمىس كۇشىنىڭ 45%-عا قىسقارۋ ءقاۋپى بار. سونداي-اق، تومەندەۋ كۇتىلەتىن وڭىرلەر تىزىمىندە قوستاناي (-29%)، اباي (-25%)، پاۆلودار (-24%) وبلىستارى بار.
جەتىسۋ بويىنشا ماسەلە ءالى دە اشىق كۇيدە قالۋدا. قازىرگى ۋاقىتتا وبلىستا جۇمىس كۇشى قىسقارا ما الدە وسە مە بەلگىسىز، ونى انىقتاۋ ءۇشىن دەرەكتەر جەتكىلىكسىز. ازىرگە ونداعى بولجامدار قىسقارادى دەپ كورسەتۋدە»، – دەدى ساراپشى.
سونداي-اق، بولجام شەڭبەرىندە 2050 جىلعا قاراي ەڭبەككە قابىلەتتى جاستان كىشى جانە ودان جوعارى جاستاعى حالىقتىڭ جىلدام ءوسۋى ەسەبىنەن ەڭبەككە قابىلەتتى جاستاعى حالىقتىڭ ۇلەسى (59 %-دان 57 %-عا دەيىن) ازداپ تومەندەيتىنى اتاپ ءوتىلدى.
بۇل رەتتە ەڭبەككە قابىلەتتى حالىقتىڭ سانى 2050 جىلعا قاراي 33%-عا ۇلعايىپ،15،68 ملن-عا جەتەدى. ەڭبەككە قابىلەتتى جاستان كىشى حالىق 36%-عا، 8،18 ملن-عا دەيىن، ال ەڭبەككە قابىلەتتى جاستان اسقان حالىق 68%-عا، 3،7 ملن-عا دەيىن وسەدى.
جالپى، 2050 جىلعا قاراي رەسپۋبليكا حالقى شامامەن 27،5 ملن ادامدى قۇرايدى دەپ كۇتىلۋدە، ولاردىڭ ۇشتەن ەكىسى مەگاپوليستەر مەن وڭتۇستىك وڭىرلەردە تۇراتىن بولادى.
كورسەتكىشتەر مەن ىقتيمال دامۋ سەنارييلەرى تۋرالى تولىعىراق ەردو سايتىنداعى 2050 جىلعا دەيىنگى دەموگرافيالىق بولجامنان بىلۋگە بولادى.