دۇنيەجۇزىلىك مەتەورولوگيالىق ۇيىم ماماندارى وسىلاي دەيدى.
ءقازىردىڭ وزىندە، جەر بەتىندەگى وزەندەردىڭ سۋ دەڭگەيى ايتارلىقتاي تومەندەپ جاتقانى بايقالادى. قۇرعاقشىلىق بەلەڭ الىپ بارادى. بۇعان الەمدەگى وزەندەردىڭ بىلتىرعى جاعدايى دالەل، دەپ حابارلايدى aqshamnews.kz 24.kz-كە سىلتەمە جاساپ.
سۋ دەڭگەيى بۇرىن-سوڭدى بولماعان كورسەتكىشكە ءتۇسىپ كەتكەن. بۇعان قۇرعاقشىلىق پەن اپتاپ سەبەپ. بۇل – دۇنيەجۇزىلىك مەتەورولوگيالىق ۇيىمنىڭ كەلتىرگەن دەرەگى.
سەلەستا ساۋلو، دۇنيەجۇزىلىك مەتەورولوگيالىق ۇيىمىنىڭ باس حاتشىسى: - 2023 جىلى الەمدەگى مۇزدىقتار ءوز ماسساسىنىڭ ەداۋىر بولىگىن جوعالتتى. ەسەپ بويىنشا مۇنداي كورسەتكىش كەيىنگى 50 جىلدا بولعان ەمەس. الەمدە ۇزاققا سوزىلعان قۇرعاقشىلىق كەسىرىنەن تابيعاتتاعى سۋ سيكلى تۇراقسىز بولىپ بارادى. ال الەمدىك قاۋىمداستىق بۇل ماسەلەدە ەشقانداي شارا قابىلداپ جاتقان جوق.
قۇرعاقشىلىق سالدارىنان بۇگىندە سولتۇستىك، ورتالىق جانە وڭتۇستىك امەريكانىڭ كوپ بولىگىندە وزەن سۋى ازايىپ قالعان. 2023 جىلى ميسسيسيپي جانە امازونكا وزەندەرى باسسەيندەرىندە سۋ دەڭگەيى رەكوردتىق كورسەتكىشكە تومەندەپ كەتتى. ساراپشىلاردىڭ سوزىنشە، وزەندەردىڭ باعىتىنان اۋىتقۋى دا كليماتتىڭ وزگەرۋىمەن تىكەلەي بايلانىستى. الاپات تاسقىندار مەن قۇرعاقشىلىقتىڭ بەلەڭ الۋى دا سوندىقتان.
ستەفان ۋلەنبرۋك، دۇنيەجۇزىلىك مەتەورولوگيالىق ۇيىمىنىڭ وكىلى: - مۇزدىقتاردىڭ ەرۋى گيدرولوگيالىق رەجيمدى تولىق وزگەرتۋى مۇمكىن. سونىمەن قاتار ەكوجۇيەگە دە كەرى اسەر ەتەدى. سونىڭ سالدارىنان اۋىل شارۋاشىلىعى سالاسى زارداپ شەگەدى. مۇزدىقتاردىڭ جىلدام ەرۋىنەن الداعى بىرنەشە جىلدا سۋ كولەمى ارتۋى مۇمكىن. ءبىراق ودان كەيىن ونىڭ مولشەرى قايتا ازايادى.
جاڭا زەرتتەۋگە سايكەس 3،5 ملرد ادام كەمى ءبىر اي سۋدان تارشىلىق كورەدى. ءتيىستى شارا قابىلداماسا، 2050 جىلعا قاراي بۇل كورسەتكىش 5 ميللياردتان اسۋى ابدەن مۇمكىن. بىلتىر الەمنىڭ ءبىرقاتار اۋماعىندا مۇزدىقتاردىڭ رەكوردتىق جىلدامدىقپەن ەرۋى تىركەلدى. ماسەلەن، سوڭعى ەكى جىلدا شۆەيساريانىڭ ءالپى تاۋلارىنداعى الىپ مۇزدار ءوز ماسساسىنىڭ شامامەن 10%-ىن جوعالتقان. Science عىلىمي جۋرنالىندا جاريالانعان زەرتتەۋگە سايكەس جاھاندىق تەمپەراتۋرا 1،5 گرادۋسقا جوعارىلاسا، جەر بەتىندەگى مۇزدىقتاردىڭ 50%-ى جويىلىپ، مۇحيت دەڭگەيى 9 سانتيمەترگە كوتەرىلەدى.