100 مىڭنان استام جۇمىس ورىندارى اشىلاتىن بولادى.
قازاقستان ۇكىمەتى 2030 جىلعا قاراي جۇمىس كۇشىندەگى جاستار ۇلەسىن 60 پايىزعا جەتكىزۋدى كودەپ وتىر. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى Almaty-akshamy.kz.
تامارا دۇيسەنوۆا ءسوز باسىندا مەملەكەت باسشىسى ءوز جولداۋىندا جاستاردى جۇمىسپەن قامتۋدى قامتاماسىز ەتۋ جانە ەڭبەك رەسۋرستارىنىڭ ساپاسىن ارتتىرۋ ماسەلەلەرىنە ەرەكشە نازار اۋدارعانىن اتاپ ءوتتى.
«جىل سايىن رەسپۋبليكا بويىنشا 300 مىڭنان استام جاس ادام ەڭبەككە قابىلەتتى جاسقا جەتىپ، ەڭبەك نارىعىنا شىعادى. 2030 جىلعا قاراي جۇمىس كۇشىندەگى جاستار ۇلەسى 60 پايىزعا جەتەدى دەپ كۇتىلۋدە»،- دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
ولاردىڭ جۇمىسپەن قامتىلۋىن قامتاماسىز ەتۋ ءۇشىن مەملەكەتتىك جانە جەكە باستامالار اياسىنداعى جوبالار بويىنشا جىل سايىن جاستار ءۇشىن مەملەكەت تاراپىنان سۋبسيديالاناتىن 100 مىڭنان استام جۇمىس ورىندارى اشىلاتىن بولادى.
«جاستاردى جۇمىسپەن قامتۋعا جاردەمدەسۋدىڭ بەلسەندى شارالارىمەن قامتۋ كەڭەيەدى. جىل سايىن 40 مىڭ تۇلەك جاستار تاجىريبەسىنە قاتىسادى. «ديپلوممەن اۋىلعا» باعدارلاماسىنا قاتىسۋشىلار ءۇشىن جاستار تاجىريبەسىنىڭ بولىگى رەتىندە تولەنەتىن ءتيىستى تولەمدەرگە تەڭ بولاتىنداي قوسىمشا جاردەماقى بەلگىلەنەدى. «العاشقى جۇمىس» جوباسى ۇبت تاپسىرا الماعان نەمەسە وقۋىن جالعاستىرماعان مەكتەپ تۇلەكتەرىنە ارنالىپ، قايتا باعىتتالاتىن بولادى»، - دەدى تامارا دۇيسەنوۆا.
ەڭبەك جانە حالىقتى الەۋەمەتتىك قورعاۋ ءمينيسترى مەملەكەت باسشىسىنىڭ تاپسىرماسى بويىنشا مينيسترلىك اگروكرەديتتىك كورپوراسيامەن بىرلەسىپ، جاستاردىڭ كاسىپكەرلىك باستامالارىن قولداۋ ماقساتىندا جىلدىق مولشەرلەمەسى 2،5 پايىزبەن جەڭىلدەتىلگەن نەسيە بەرۋدىڭ تەتىكتەرى مەن پارامەترلەرىن ازىرلەپ جاتقانىن قوسىمشا ايتىپ ءوتتى. جىل سايىن بۇل قولداۋدى 6 مىڭعا دەيىن جاس پايدالانادى. بۇل ماقساتتارعا بيۋدجەتتە قاراستىرىلعان سوما جىل سايىن شامامەن 30 ميلليارد تەڭگەنى قۇرايدى.
حالىقتىڭ الەۋمەتتىك وسال توپتارىنداعى جاستارعا بيزنەس-يدەيالارىن جۇزەگە اسىرۋ ءۇشىن جىل سايىن 1،2 ميلليون تەڭگەدەن استام سوماعا 9 مىڭ قايتارىمسىز گرانتتار بەرىلەتىن بولادى.