شيكى گازدى ءوندىرۋدى جىل سايىن 1،5 ەسەگە، ياعني 57 ملرد تەكشە مەتردەن 87 ملرد تەكشە مەترگە دەيىن ارتتىرۋ جوسپارلانىپ وتىر.
وسىلايشا ەلىمىزدىڭ ورتالىق جانە سولتۇستىك وڭىرلەرى تابيعي گازعا قول جەتكىزە الادى،دەپ حابارلايدى Almaty-akshamy.kz اtameken.kz-كە سىلتەمە جاساپ.
ەلىمىزدىڭ گاز سالاسىن دامىتۋدىڭ 2022-2026 جىلدارعا ارنالعان كەشەندى جوسپارىنا سايكەس، 2030 جىلعا قاراي كوگىلدىر وتىنمەن 13،5 ملن ادامدى نەمەسە حالىقتىڭ 65%-ى قامتۋ جوسپارلانىپ وتىر.
نەگىزگى كورسەتكىشتەردىڭ قاتارىنا تاۋارلىق گازدىڭ رەسۋرستىق بازاسىن ۇلعايتۋ دا جاتادى. كوگىلدىر وتىندى الۋ مەن ءوندىرۋ 2021 جىلعى 29،4 ملرد تەكشە مەتردەن 2030 جىلعا قاراي 42 ملرد تەكشە مەترگە دەيىن بولماق. بۇدان بولەك گاز تاسىمالداۋ ينفراقۇرىلىمىنىڭ توزۋىن 25%-عا دەيىن قىسقارتۋدى دا ايتۋعا بولادى.
گازدىڭ بولجامدى تەڭگەرىمى بويىنشا شيكى گازدى ءوندىرۋدى جىل سايىن 1،5 ەسەگە، ياعني 57 ملرد تەكشە مەتردەن 87 ملرد مەكشە مەترگە دەيىن ارتتىرۋ جوسپارلانىپ وتىر. بۇل جىل سايىنعى ءوسىمنىڭ ورتاشا ەسەپپەن 5%-عا دەيىن بولۋىنا مۇمكىندىك بەرەدى. ونىڭ ىشىندە جوسپارلانىپ وتىرعان جاڭا كەن ورىندارىن ىسكە قوسۋ ارقىلى ولاردىڭ ۇلەسىن قازىرگى نولدىك ماننەن 6%-عا دەيىن جەتكىزۋ جوسپاردا بار.
«جوسپارعا قاراماستان، ءىس جۇزىندە وندىرىلەتىن شيكى گازدىڭ ۇشتەن ءبىرى، نەگىزىنەن ىلەسپە مۇناي گازى قاباتقا كەرى ايداۋ ءۇشىن، قابات قىسىمىن قولداۋعا جانە باسقا دا قاجەتتىلىكتەر ءۇشىن پايدالانىلاتىنىن ۇمىتپاۋ كەرەك. ىسكە اسىرۋعا ارنالعان قالعان كولەمدى ەلەكتر ەنەرگياسىن وندىرۋدە، گاز حيمياسىندا جانە مەتاللۋرگيا كاسىپورىندارىن قايتا جاراقتاندىرۋدا 25 ملرد تەكشە مەتردەن 33 ملرد تەكشە مەترگە دەيىن ارتتىرۋ جوسپارلانىپ وتىر»، - دەپ اتاپ ءوتتى «اتامەكەن» ق ر ۇكپ بازالىق سالالار دەپارتامەنتىنىڭ باسقارۋشى ديرەكتورى دىنمۇحامەد قۇدايبەرگەنوۆ.
كەشەندى جوسپاردىڭ تاعى ءبىر ماڭىزدى تارماعىنا تاۋارلىق گازدى پەرسپەكتيۆالىق تۇتىنۋ بويىنشا بولجامدار جاتادى. اتاپ ايتقاندا، ونى گاز موتورلى وتىن رەتىندە پايدالانۋ بويىنشا ءىس-شارالاردىڭ ىسكە اسىرىلۋىن جالعاستىرۋ. ۇكىمەت 2018 جىلى باعدارلامانى قاۋلىمەن بەكىتىپ، كولىك ءۇشىن 500 ملن م3-قا دەيىن تاۋارلىق گاز رەزەرۆكە قويىلدى.
«دەسەك تە، قوعامدىق كولىكتى گاز موتورلى وتىنعا كوشىرۋ جونىندەگى جوسپاردىڭ ورىندالماۋىن اتاپ ءوتۋ قاجەت. ءىس جۇزىندە جىلىنا گازدىڭ 50 ملن تەكشە مەتردەن ارتىق ەمەس كولەمى پايدالانىلدى. شاعىن جانە ورتا بيزنەس سۋبەكتىلەرىن مىندەتتى تۇردە تارتا وتىرىپ، باعدارلامانى جاڭارتۋ قاجەت. بۇدان بولەك وڭىرلىك جانە الەمدىك ۇزدىك تاجىريبە مىسالدارى ارقىلى مەملەكەتتىك قولداۋ مەن ىنتالاندىرۋ شارالارىن تالقىلاۋ كەرەك»، - دەدى سپيكەر.
دىنمۇحامەد قۇدايبەرگەنوۆ تابيعي گازدى سىعىمداۋ (CNG) جانە سۇيىلتۋ (LPG) تەحنولوگيالارىن تانىتۋ بويىنشا الدا اۋقىمدى جۇمىستار تۇرعانىن اتاپ ءوتتى. سونىمەن قاتار ينستيتۋسيونالدىق ينۆەستيسيالىق قورلار مەن ESG قارجىلاندىرۋ ارقىلى ينۆەستيسيالار مەن وزىق تەحنولوگيالاردى تارتۋ تەتىكتەرىن قالىپتاستىرۋ بويىنشا جۇمىستار دا بار.
«گاز تەڭگەرىمى كەشەندى باعدارلامادا 2030 جىلعا دەيىن جاسالدى. وندا كورسەتىلگەن شارالاردىڭ قامتاماسىز ەتىلۋىن وسى بەسجىلدىقتا ىسكە اسىرۋ قاجەت. بۇل ورتالىق مەملەكەتتىك ورگاندار مەن كورپوراتيۆتىك سەكتور دەڭگەيىندە ستاندارتتى ەمەس شەشىمدەردىڭ قابىلداۋىن تالاپ ەتەدى»، - دەپ ءتۇسىندىردى دىنمۇحامەد قۇدايبەرگەنوۆ.
2022 جىلعى 18 شىلدەدە ۇكىمەت ەلىمىزدىڭ گاز سالاسىن دامىتۋدىڭ 2022-2026 جىلدارعا ارنالعان كەشەندى جوسپارىن بەكىتتى. ونىڭ نەگىزگى ماقساتىنا تۇتىنۋشىلاردى تابيعي گازبەن ءقاۋىپسىز جانە ۇزدىكسىز قامتاماسىز ەتۋ جاتادى. بۇدان بولەك ترانزيت، رەسۋرستىق بازانى كەڭەيتۋ جانە گاز ەكسپورتى كولەمىن ۇلعايتۋ بويىنشا مىندەتتەمەلەردى ورىنداۋ دا كىرەدى.