مادەنيەت جانە سپورت مينيسترلىگى قازاقستاننىڭ 2023-2029 جىلدارعا ارنالعان مادەني ساياساتىن دامىتۋ تۇجىرىمداماسىن ۇسىندى.
قۇجاتتا وتاندىق تەاترلارعا ەرەكشە كوڭىل بولىنگەن. نىسانالى ينديكاتورلاردىڭ ءبىرى - قازاقستاندىق اۆتورلاردىڭ قويىلىمدارىن ءۇش ەسە ۇلعايتۋ، دەپ حابارلايدى Almaty-akshamy.kz قازاقپاراتقا سىلتەمە جاساپ.
2029 جىلعا قاراي جىل سايىن قازاقستاندىق اۆتورلاردىڭ 600 سپەكتاكلى ساحنالانباق. قويىلىمدار سانىنىڭ ارتۋى كەزەڭ-كەزەڭىمەن جۇزەگە اسادى. مىسالى، بيىل 245 سپەكتاكل قويۋ مىندەتى تۇر، بۇل وتكەن جىلمەن سالىستىرعاندا 62 قويىلىمعا ارتىق.
تۇجىرىمداما، سونىمەن قاتار ينكليۋزيۆتى توپتىڭ بالالارى ءۇشىن تەاتر ترۋپپالارىن اشۋدى، ەرەكشە قاجەتتىلىكتەرى بار ادامدارعا سپەكتاكلدەردىڭ ونلاين-كورسەتىلىمدەرىن ۇيىمداستىرۋدى، جاڭا تەاترلار سالۋدى جانە جاس تالانتتاردى مەملەكەتتىك قولداۋ شارالارىن ودان ءارى ىسكە اسىرۋدى كوزدەيدى.
«ەلىمىزدىڭ تەاتر ونەرىن دامىتۋ - الداعى بىرنەشە جىلداعى باستى مىندەتتەرىمىزدىڭ ءبىرى. تەاتر ءبىزدىڭ ازاماتتارىمىزعا بارىنشا قولجەتىمدى بولۋى ءتيىس. بۇل تەك كورەرمەندەر ءۇشىن عانا ەمەس، سونىمەن قاتار جاس تالانتتى دراماتۋرگتەر ءۇشىن دە كەرەك. جاڭا اۆتورلارسىز دامۋ مۇمكىن ەمەس، سوندىقتان ءبىزدىڭ مينيسترلىك جاڭا ەسىمدەردى تانىتۋعا ەرەكشە نازار اۋدارادى. ماسەلەن، وتكەن جىلى ادەبيەت سالاسىنداعى «ايبوز» تۇڭعىش ۇلتتىق سىيلىعى تابىس ەتىلدى. بيىل قازاقستاندىق جاس جازۋشىلار مەن اقىندارعا ارنالعان پرەزيدەنتتىك ادەبي سىيلىق تابىستالادى»، – دەدى مادەنيەت جانە سپورت ۆيسە-مينيسترى نۇرعيسا داۋەشوۆ.