اۋىلدا ينتەرنەت پايدالانۋشىلاردىڭ ۇلەسى 97%-عا جەتپەك.
ۇكىمەتتە ۇلتتىق جوبالاردى ازىرلەۋ بارىسى تالقىلاندى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
پرەمەر-مينيستردىڭ ورىنباسارى – قارجى ءمينيسترى ەرۇلان جاماۋبايەۆ "قولجەتىمدى ينتەرنەت" جانە "ءاربىر ەلدى مەكەندە تازا اۋىز سۋ" ۇلتتىق جوبالارىن ىسكە اسىرۋ جونىندە كەڭەس وتكىزدى.
سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ مالىمەتىنشە، 2027 جىلى كەڭ جولاقتى ينتەرنەتتىڭ ۇيدەگى جەلىلەرىنە قول جەتكىزۋ دەڭگەيى 100%-عا جەتەدى. سونىمەن قاتار 2027 جىلى 5G-مەن قامتۋ رەسپۋبليكالىق ماڭىزى بار قالالاردا 75%-عا، وبلىس ورتالىقتارىنىڭ قالالارىندا 60%-عا جەتپەك. ال اۋىلدىق جەرلەردە ينتەرنەت جەلىسىن پايدالانۋشىلاردىڭ ۇلەسى 2027 جىلى 97%-عا جاقىندايدى.
سونىمەن قاتار كەڭەسكە قاتىسۋشىلار مەملەكەت باسشىسىنىڭ حالىقتى اۋىز سۋمەن ءجۇز پايىز قامتاماسىز ەتۋ جونىندەگى تاپسىرماسىن ورىنداۋ شەڭبەرىندە ازىرلەنگەن "ءاربىر ەلدى مەكەندە تازا اۋىز سۋ" ۇلتتىق جوباسىن قارادى.
ق ر يندۋستريا جانە ينفراقۇرىلىمدىق دامۋ مينيسترلىگى وسى جوبانى قارجىلاندىرۋدى قايتا قارادى. ونى ىسكە اسىرۋ 2025 جىلدىڭ قورىتىندىسى بويىنشا بارلىق قالالار مەن اۋىلداردى سۋمەن جابدىقتاۋ قىزمەتتەرىنە 100% قولجەتىمدىلىكتى قامتاماسىز ەتۋگە مۇمكىندىك بەرەدى.
كەڭەس قورىتىندىسى بويىنشا ەرۇلان جاماۋبايەۆ ءتيىستى مەملەكەتتىك ورگاندارعا ناقتى تاپسىرمالار بەردى.