الماتىدا اۆتوموبيلدەردىڭ ۇلكەن اعىنىمەن بايلانىستى پروبلەمانى شەشۋ ءۇشىن قالاعا كىرەتىن ماگيسترالداردىڭ سانىن كوبەيتۋ قاجەت. بۇل تۋرالى الماتى اكىمى ەربولات دوسايەۆ وكق بريفينگىندە جۋرناليستەردىڭ سۇراقتارىنا وراي بەرگەن جاۋابىندا ايتتى.
بۇگىندە 2 كوشەدە – رىسقۇلوۆ داڭعىلى مەن ساين كوشەلەرىن باكاد-قا دەيىن تەسۋ جۇمىستارى جۇرگىزىلىپ جاتىر. سونىمەن قاتار باكاد-قا اپاراتىن 3 راديالدى جولدى تەسۋ بويىنشا جسق ازىرلەنۋدە. بۇل اباي داڭعىلىنىڭ، سيەۆەرنوە اينالما كوشەسى جانە تىلەندييەۆ كوشەسىنىڭ ەكىنشى بولىگى. ءبىز بۇل جۇمىستاردى 2027 جىلعا دەيىن كەزەڭ-كەزەڭىمەن اياقتاۋدى جوسپارلانىپ وتىر.
شاھار باسشىسىنىڭ ايتۋىنشا، قولدانىستاعى قالاعا كىرەتىن ءىرى ماگيسترالداردىڭ وتكىزۋ قابىلەتىن ارتتىرۋ ماقساتىندا قۇلجا تراكتىسىن رىسقۇلوۆ داڭعىلىنان بۇقتىرما كوشەسىنە دەيىن التى جولاققا دەيىن كەڭەيتۋگە جسق ازىرلەۋ باستالدى.
قازىرگى تاڭدا قالا ىشىندەگى كولىك جۇكتەمەسىن ازايتۋ ءۇشىن تولە بي كوشەسىن (ياسساۋي كوشەسىنەن قالا شەكاراسىنا دەيىن) تەسۋ جۇمىستارى جۇرگىزىلۋدە. 2024 جىلى قاجىمۇقان كوشەسىن (سەيفۋللين داڭعىلىنان جاماقايەۆ كوشەسىنە دەيىن) جانە جۇبانوۆ كوشەسىن (مومىش ۇلى كوشەسىنەن قالا شەكاراسىنا دەيىن) تەسۋ جۇمىستارىن باستاۋ جوسپارلانۋدا، مۇقانوۆ كوشەسىن (رايىمبەك داڭعىلىنان مۇقانوۆ كوشەسىنە دەيىن) تەسۋگە جسق ازىرلەنۋدە. جۇمىستاردى 2027 جىلعا دەيىن اياقتاۋ جوسپارلانۋدا.
شاھار باسشىسى ءوزىنىڭ تاپسىرماسى بويىنشا جول قوزعالىسىن باسقارۋدىڭ اۆتوماتتاندىرىلعان جۇيەسىن ەنگىزۋ بويىنشا جۇمىستار جۇرگىزىلىپ جاتقانىن حابارلادى. بۇعان قالاداعى قالعان 498 باعدارشام دا كىرەدى.
«2021 جىلدىڭ قىركۇيەگىندە ءبىز جاڭعىرتۋدىڭ ءبىرىنشى كەزەڭى بويىنشا جۇمىستاردى اياقتادىق. بۇگىندە 591 نىساننىڭ 93ء-ى اۆتوماتتى رەجيمدە جۇمىس ىستەيدى. جالپى، جۇمىستار 2025 جىلعا دەيىن تولىق اياقتالادى دەپ جوسپارلانىپ وتىر. اۆتوماتتاندىرىلعان جۇيە كوشەلەردىڭ وتكىزۋ قابىلەتىن ارتتىرۋعا مۇمكىندىك بەرەدى»، - دەپ تۇيىندەدى قالا اكىمى.