پرەمەر-مينيستردىڭ ورىنباسارى قانات بوزىمبايەۆ مينيسترلىكتەردىڭ، وبلىس اكىمدىكتەرىنىڭ جانە «Amanat» پارتياسىنىڭ قاتىسۋىمەن وڭىرلىك دامۋ جونىندەگى جوبا كەڭسەسىنىڭ وتىرىسىن وتكىزدى، - دەپ حابارلايدى Aqshamnews.kz Primeminister.kz-كە سىلتەمە جاساپ.
وتىرىستا «اۋىل اماناتى» جوباسىن جۇزەگە اسىرۋ بويىنشا اتقارىلعان جۇمىستار تۋرالى، سونداي-اق بىلتىر قاراشا ايىندا وتكەن اۋىل اكىمدەرىنىڭ ديالوگ-پلاتفورماسىنىڭ قورىتىندىسى بويىنشا مەملەكەت باسشىسى بەرگەن تاپسىرمالاردىڭ ورىندالۋ بارىسى جونىندە ەسەپ تىڭدالدى.
2025 جىلدان باستاپ «اۋىل اماناتى» جوباسى جاڭا قاعيداتتار نەگىزىندە جۇزەگە اسىرىلىپ كەلدە. قارجىلاندىرۋ وڭىرلەردىڭ ناقتى قاجەتتىلىكتەرىن ەسكەرە وتىرىپ، ارتىق بيۋروكراتيالىق راسىمدەرسىز بولىنۋدە. كووپەراسيانى دامىتۋ مەن اۋىل شارۋاشىلىعى ونىمدەرىن وڭدەۋگە باسا نازار اۋدارىلعان.
2025 جىلى جوباعا وبلىس اكىمدىكتەرىنە 50 ملرد تەڭگە ءبولىندى. 2026 جىلى رەسپۋبليكالىق بيۋدجەتتە جوبانى جالعاستىرۋعا 100 ملرد تەڭگە قاراستىرىلعان، ونىڭ شامامەن 60 ملرد تەڭگەسى 600-گە جۋىق كووپەراتيۆتى قولداۋعا باعىتتالماق.
وتىرىستا اقمولا وبلىسىنىڭ ەرەيمەنتاۋ اۋدانىندا ەت كلاستەرىن قۇرۋ جوباسىن ىسكە قوسۋ پەرسپەكتيۆالارىنا ەرەكشە كوڭىل ءبولىندى. جوبا ءوڭىر ءۇشىن ماڭىزدى مانگە يە. وسىعان بايلانىستى قانات بوزىمبايەۆ مەملەكەتتىك قولداۋ باعدارلامالارىن ەسكەرە وتىرىپ، جوبانىڭ ەكونوميكالىق جانە ۇيىمداستىرۋشىلىق پارامەترلەرىن قوسىمشا پىسىقتاۋدى تاپسىردى.
كەڭەس قورىتىندىسى بويىنشا پرەمەر-مينيستردىڭ ورىنباسارى ۇلتتىق ەكونوميكا مينيسترلىگىنە الەۋمەتتىك-كاسىپكەرلىك كورپوراسيالاردىڭ قىزمەتىن قايتا پىشىمدەۋ جونىندە ۇسىنىستار دايىنداۋدى، سونداي-اق «اۋىل كاسىپكەرلىگى ينفراقۇرىلىمى» باعىتىن وڭىرلىك ستاندارتتار جۇيەسىنە ەنگىزۋدى تاپسىردى.
«دامۋ» كاسىپكەرلىكتى دامىتۋ قورى» اق-مەن بىرلەسىپ، «اۋىل اماناتى» جوباسى اياسىندا كەپىلدىك بەرۋ تەتىكتەرىن ازىرلەۋ جانە ءتيىستى نورماتيۆتىك-قۇقىقتىق اكتىلەرگە وزگەرىستەر ەنگىزۋ مىندەتتەلدى.
وبلىس اكىمدىكتەرىنە ەكى اپتا مەرزىمدە «Amanat Nesie» اقپاراتتىق جۇيەسىنە بارلىق وڭىرلەردىڭ تولىق قوسىلۋىن قامتاماسىز ەتىپ، اۋىل تۇرعىندارىنا «اۋىل اماناتى» باعدارلاماسى بويىنشا جەڭىلدىكتى نەسيەلەر بەرۋدى ۇيىمداستىرۋ تاپسىرىلدى.