بۇل تۋرالى ۇكىمەت وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ ايتتى.
2025 جىلعا قاراي قۇس فابريكالارىن سالۋ جانە جاڭعىرتۋ ەسەبىنەن تولىق يمپورتتى الماستىرۋ جوسپارلانىپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2021 جىلى قۇس ەتى بويىنشا يمپورت ۇلەسى 168،5 مىڭ توننانى، جەرگىلىكتى ءوندىرىس 282،3 مىڭ توننانى قۇرادى. وسىلايشا، جالپى ءوندىرىس قۋاتى جىلىنا 223،1 مىڭ توننانى قۇرايتىن 23 قۇس فابريكاسىن سالۋ جانە جاڭعىرتۋ ەسەبىنەن 2025 جىلعا قاراي تولىق يمپورتتى الماستىرۋ جوسپارلانىپ وتىر»، - دەدى ەربول قاراشوكەيەۆ.
سونىمەن قاتار ول 2025 جىلدىڭ سوڭىنا دەيىن 24 ەت كومبيناتى پايدالانۋعا بەرىلەتىندىگىن ايتتى.
«2025 جىلدىڭ سوڭىنا دەيىن 24 ەت كومبيناتىن ىسكە قوسۋ، 8،2 مىڭ گەكتار الاڭدا باقتار سالۋ بويىنشا 22 جوبا، 20 ءسۇت وڭدەۋ زاۋىتىن ىسكە قوسۋ، 23 قۇس فابريكاسىن سالۋ جانە كەڭەيتۋ، جاڭعىرتۋعا قاتىستى 2 جوبا جانە 1 قانت زاۋىتىن سالۋ جوسپارلانۋدا»، - دەدى مينيستر.