بۇل تالاپ شەتەلدە مۇلكى بار ادامدارعا جانە باسقا دا كەيبىر ساناتقا جاتاتىن ازاماتتارعا قاتىستى.
2025 جىلى قازاقستاندا بەلگىلى ءبىر ساناتتاعى ازاماتتار 250-فورما بويىنشا دەكلاراسيانى تاپسىرۋعا مىندەتتەلەدى، – دەپ حابارلايدى aqshamnews.kz
باستاپقى جوسپارعا سايكەس، 2025 جىلى جالپىعا بىردەي دەكلاراسيالاۋ بارلىق ەرەسەك قازاقستاندىقتاردى، ونىڭ ىشىندە ستۋدەنتتەر مەن زەينەتكەرلەردى قامتۋى كەرەك ەدى. ءبىراق كەيىن بۇل جوسپار قايتا قارالىپ، بەلگىلى ءبىر ازاماتتار دەكلاراسيا تاپسىرۋدان بوساتىلدى. دەگەنمەن كەيبىر توپتارعا بۇل تالاپ كۇشىندە قالادى.
الماتى قالاسى مەملەكەتتىك كىرىستەر دەپارتامەنتىنىڭ حابارلاۋىنشا، 2025 جىلى دەكلاراسيا تاپسىرۋعا مىندەتتى ازاماتتار قاتارىنا كەلەسى ساناتتاعىلار جاتادى:
شەتەلدە مۇلكى بار قازاقستان ازاماتتارى مەن رەزيدەنتتەرى؛
مەملەكەتتىك جانە سايلانبالى لاۋازىمدارعا كانديداتتار؛
بانكتەردىڭ، باعالى قاعازدار نارىعىنىڭ نەمەسە ساقتاندىرۋ ۇيىمدارىنىڭ ءىرى قاتىسۋشىلارى بولۋعا ءوتىنىش بەرگەن تۇلعالار؛
جەكە پراكتيكامەن اينالىساتىن تۇلعالار (ادۆوكاتتار، نوتاريۋستار، جەكە سوت ورىنداۋشىلار جانە ت.ب.).
قازاقستاندا جانە شەتەلدە 20 000 اەك-تەن استام (2024 جىلى بۇل شامامەن 73 840 000 تەڭگە) سومادا ءىرى كولەمدەگى ساتىپ الۋ جاساعان ازاماتتار.
بۇل رەتتە كەز كەلگەن قازاقستاندىق ازاماتتىڭ دەكلاراسيا تاپسىرۋعا نيەتى بولسا، قولما-قول اقشانى (10 000 اەك-كە دەيىن) جانە باسقا اكتيۆتەردى ازاماتتار ءوز ەركىمەن دە دەكلاراسيالاي الادى.
شەتەلدەگى مۇلىككە كەلەتىن بولساق، دەكلاراسيالانۋعا ءتيىس دۇنيەلەر ءتىزىمى:
جىلجىمايتىن مۇلىك جانە كولىك قۇرالدارى؛
شەتەلدىك كومپانيالارعا نەمەسە تۇرعىن ءۇي قۇرىلىسىنا قاتىسۋ ۇلەسى؛ شەتەل بانكتەرىندەگى شوتتارداعى قاراجات، ەگەر ولاردىڭ سوماسى 1000 اەك-تەن اسسا؛
باعالى قاعازدار، تۋىندى قارجى قۇرالدارى؛ دەلدالدىق شوتتارداعى قاراجاتتار؛ زياتكەرلىك مەنشىك وبەكتىلەرى، اۆتورلىق قۇقىقتار؛ سيفرلىق اكتيۆتەر؛
دەبيتورلىق/كرەديتورلىق بەرەشەك؛ ينۆەستيسيا جانە باعالى مەتالدار؛
قۇنى 1000 اەك-تەن اساتىن مۇلىك: انتيكۆاريات، ءساندى زاتتار نەمەسە باسقا دا قۇندى مۇلىك.
دەكلاراسياعا 2024 جىلدىڭ 31 جەلتوقسانىنا دەيىنگى جاعداي بويىنشا تيەسىلى بارلىق اكتيۆتەر مەن مىندەتتەمەلەر ەنگىزىلۋگە ءتيىس ەكەنىن ەسكەرىڭىز.