2025 جىلى ازىق-تۇلىك كەلىسىمشارت كورپوراسياسىنىڭ ەنشىلەس ۇيىمى - «استىق قويمالارى» جاۋاپكەرشىلىگى شەكتەۋلى سەرىكتەستىگى ەليەۆاتورلاردىڭ تۇراقتى جۇمىسىن قامتاماسىز ەتىپ، استىقتىڭ، ونىڭ ىشىندە مەملەكەتتىك قوردىڭ ساقتالۋىن تولىق دەڭگەيدە جۇزەگە اسىردى، - دەپ حابارلايدى aqshamnews.kz.
قاڭتار ايىنان جەلتوقسان ايىنا دەيىن سەرىكتەستىكتىڭ استىق قابىلداۋ پۋنكتتەرىنە 434 مىڭ توننا استىق قابىلداندى، ونىڭ 358 مىڭ تونناسى — جاڭا ءونىم. 2026 جىلعى 19 قاڭتارداعى جاعداي بويىنشا «استىق قويمالارى» سەرىكتەستىگىنىڭ ەليەۆاتورلارىندا 264 مىڭ توننا استىق ساقتاۋلى.
جىل بويى ءتورت استىق بازاسىنان 432 مىڭ توننا ءداندى جانە مايلى داقىلدار جونەلتىلدى. 2024 جىلدىڭ وسى كەزەڭىمەن سالىستىرعاندا جونەلتۋ كولەمى 25 پايىزعا ءوستى.
استىق قابىلداۋ ۇدەرىسىنىڭ اشىقتىعىن قامتاماسىز ەتۋ ماقساتىندا بارلىق استىق قابىلداۋ بەكەتتەرىندە اۋىل شارۋاشىلىعى ءونىمىن ولشەۋدىڭ سۋرەت ارقىلى تىركەۋى بار اقپاراتتىق جۇيە ەنگىزىلدى. بۇل ادام فاكتورى اسەرىن بارىنشا ازايتۋعا مۇمكىندىك بەرەدى.
وتكەن جىلدىڭ قورىتىندىسى بويىنشا سەرىكتەستىك استىق قابىلداۋ بەكەتتەرىنىڭ ينفراقۇرىلىمىن كۇتىپ-ۇستاۋ جانە جاڭعىرتۋعا 404 ميلليون تەڭگە ءبولدى. ءۇش استىق بازاسى ءۇشىن استىق كەپتىرگىش قوندىرعىلار مەن اۆتوكولىك ساتىپ الىندى، قويما عيماراتتارى جوندەلدى، سونداي-اق تەمىرجول كىرمە جولدارىنداعى باعىتتاما اۋىستىرىلدى.
2026 جىلى «استىق قويمالارى» وندىرىستىك قۋاتتاردى جاڭعىرتۋدى جالعاستىرا وتىرىپ، ەليەۆاتور جەلىسىنىڭ مۇمكىندىكتەرىن كەڭەيتۋگە باعىتتالعان ينۆەستيسيالىق جوبالاردى ىسكە اسىرۋدى جوسپارلاپ وتىر.