پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ءماجىلىس دەپۋتاتىنىڭ ساۋالىنا جولداعان جاۋاپتا مەملەكەت بيزنەستى قولداۋدىڭ ستراتەگيالىق ءتاسىلى قولعا الىنعانىن ءمالىم ەتتى، - دەپ حابارلايدى Aqshamnews.kz.
- بيزنەستى مەملەكەتتىك قولداۋدىڭ ءبىرىڭعاي ستراتەگيالىق ءتاسىلىن قالىپتاستىرۋ جۇمىسى باستالدى. قولدانىستاعى شارالارعا ريەۆيزيا جۇرگىزىلىپ، مەملەكەتتىك قولداۋ شارالارىنىڭ ءبىرىڭعاي ءتىزىلىمى قالىپتاستىرىلدى. ولاردىڭ تيىمدىلىگىن باعالايتىن وكىلەتتىكتەر ۇلتتىق ەكونوميكا مينيسترلىگىنە بەرىلدى.
مەملەكەتتىك قولداۋ شارالارىنىڭ ناتيجەلىلىگىن باعالاۋ كىرىستەردىڭ ءوسۋىن، جالپى ءونىم كولەمىن، ەڭبەك ونىمدىلىگىن، سالىق تۇسىمدەرىن، ەكسپورتتى جانە جۇمىس ورىندارىن قۇرۋدى قوسا العاندا، ولشەنەتىن كورسەتكىشتەرگە نەگىزدەلەدى. بۇگىنگى تاڭدا قارجى مينيسترلىگىنىڭ اقپاراتتىق جۇيەلەرىندە بيزنەس سۋبەكتىلەرىنىڭ مارتەبەسى، سالىق جۇكتەمەسى، باسقا قولداۋ شارالارىنا قاتىسۋى جانە بيۋدجەت كورسەتكىشتەرى تۋرالى تولىق جانە سەنىمدى اقپارات بار. بۇل ءاربىر شارانىڭ تيىمدىلىگىن وبەكتيۆتى باعالاۋعا مۇمكىندىك بەرەدى، - دەپ جازىلعان جاۋاپتا.
قولداۋ شارالارىنىڭ تيىمدىلىگىن باعالاۋ ءۇشىن مەملەكەتتىك ورگاندار مەن وپەراتورلاردىڭ اقپاراتتىق جۇيەلەرىن «Baqylauda» اقپاراتتىق جۇيەسىنە ينتەگراسيالاۋ ارقىلى، ەكى دەڭگەيلى جۇيە نەگىزدەلگەن سيفرلىق مونيتورينگ ەنگىزىلىپ وتىر.
- جەكە باعالاۋ الىنعان قولداۋدى قارسى مىندەتتەمەلەردى ورىنداۋمەن سالىستىرۋ ارقىلى جۇرگىزىلەتىن بولادى. مونيتورينگ ناتيجەلەرىن ۇەم مەملەكەتتىك قولداۋ شارالارىنىڭ تيىمدىلىگىن تالداۋ كەزىندە پايدالانادى جانە ولاردى جەتىلدىرۋ نە ءتيىمسىز قۇرالداردى الىپ تاستاۋ جونىندە ۇسىنىستار ازىرلەي وتىرىپ، ۇكىمەت جانىنداعى كاسىپكەرلىك قىزمەتتى رەتتەۋ ماسەلەلەرى جونىندەگى ۆەدومستۆوارالىق كوميسسيانىڭ وتىرىستارىندا جىل سايىن قارالادى. ءقازىر 2027 جىلعى 1 قاڭتاردان باستاپ تىزىلىمگە ەنگىزىلمەگەن شارالاردى ۇسىنۋعا تىيىم سالۋدى جانە قارجىمينىنە مونيتورينگ بويىنشا وكىلەتتىكتەر بەرۋدى قوسا العاندا، وسى تاسىلدەردى زاڭنامالىق بەكىتۋ بويىنشا جۇمىس جۇرگىزىلىپ جاتىر. ءتيىستى تۇزەتۋلەر سيفرلىق كودەكسكە ىلەسپە زاڭىندا كوزدەلگەن، - دەپ جازادى سەرىك جۇمانعارين.