قازاقستاندا ىشكى نارىقتىڭ قاجەتتىلىكتەرىن تولىق وتەيتىن سيىر ەتىن ءوندىرۋدىڭ تۇراقتى ءوسىمى جالعاسۋدا.
2024 جىلدىڭ قورىتىندىسى بويىنشا سيىر ەتى ءوندىرىسى 430 مىڭ توننانى قۇراپ، 2023 جىلمەن سالىستىرعاندا 7،5%-عا ارتتى، دەپ حابارلايدى aqshamnews.kz.
2025 جىلى بۇل ديناميكا ساقتالۋدا: قاڭتار ايىندا 24،7 مىڭ توننا ەت ءوندىرىلدى، بۇل وتكەن جىلدىڭ سايكەس كەزەڭىمەن سالىستىرعاندا 5،2%-عا جوعارى.
قازىرگى ۋاقىتتا قازاقستاندىق سيىر ەتى مەن ءتىرى ءىرى قارا مال الەمنىڭ 8 ەلىنە ەكسپورتتالۋدا، بۇل وتاندىق وندىرۋشىلەر ونىمدەرىنىڭ جوعارى ساپاسى مەن باسەكەگە قابىلەتتىلىگىن كورسەتەدى.
سالانى دامىتۋ ماقساتىندا جالپى سىيىمدىلىعى 380،1 مىڭ باسقا ارنالعان 249 بورداقىلاۋ الاڭى جۇمىس ىستەيدى. جۇرگىزىلگەن مونيتورينگكە سايكەس، قازىرگى تاڭدا بورداقىلاۋدا 174،2 مىڭ ءىرى قارا مال بار، بۇل جالپى قۋاتتىلىقتىڭ 45،8%-ىن قۇرايدى.
اۋىل شارۋاشىلىعى تاۋار وندىرۋشىلەرىن قولداۋ ماقساتىندا مەملەكەت تاراپىنان بورداقىلاۋ الاڭدارىنا نەمەسە ەت وڭدەۋ كاسىپورىندارىنا وتكىزىلگەن بۇقاشىقتاردى سۋبسيديالاۋ جۇرگىزىلۋدە. قازىرگى ۋاقىتتا 130 مىڭ ءىرى قارا مالدى قامتيتىن 6،4 ملرد تەڭگە كولەمىندە سۋبسيديا تولەندى. سۋبسيديا مولشەرى ءتىرى سالماعىنىڭ ءار كيلوگرامىنا 200 تەڭگەنى قۇرايدى.
اۋىل شارۋاشىلىعى مينيسترلىگى ساپالى ەت ونىمدەرىن ءوندىرۋدى ىنتالاندىرۋ، ەكسپورتتىق مۇمكىندىكتەردى كەڭەيتۋ جانە مال شارۋاشىلىعى سالاسىنىڭ تيىمدىلىگىن ارتتىرۋ بويىنشا جۇمىستاردى جالعاستىرۋدا.