العاش رەت نەسيە الاتىندارعا ونلاين كرەديت بەرىلمەيدى
2025 جىلدان باستاپ قارجى سالاسىنداعى ەرەجەلەر كۇشەيتىلدى. ەندى العاش رەت نەسيە الۋدى جوسپارلاعان ازاماتتار بانكتەر مەن ميكروقارجى ۇيىمدارىنان (مقۇ) ونلاين كرەديت الا المايدى. ولار مىندەتتى تۇردە قارجى ۇيىمىنىڭ كەڭسەسىنە بارىپ، جەكە تۇلعامەن نەسيە راسىمدەۋى قاجەت، دەپ حابارلايدى aqshamnews.kz
بۇل وزگەرىستەر نە ءۇشىن ەنگىزىلدى؟
قارجى نارىعىن رەتتەۋ جانە دامىتۋ اگەنتتىگى (قنردا) قارجىلىق جانە كيبەرقاۋىپسىزدىكتى ارتتىرۋ ماقساتىندا نەسيە بەرۋ تالاپتارىن قاتاڭداتۋدا. ونلاين نەسيە بەرۋدى شەكتەۋمەن قاتار كەلەسى شارالار دا قولعا الىنادى:
- 21 جاسقا تولماعاندار مەن 55 جاستان اسقاندار ءۇشىن نەسيە الۋ ءۇشىن قوسىمشا كەلىسىم الۋ قاجەت؛
- SIM-كارتالاردى ساتۋعا شەكتەۋلەر ەنگىزىلەدى؛
- مىندەتتى بيومەتريالىق سايكەستەندىرۋ ەنگىزىلەدى؛
- الاياقتىقپەن كۇرەس ماقساتىندا بايلانىس وپەراتورلارى انتيفرود جۇيەلەرىن قۇرادى؛
- SIM-بوكستاردى پايدالانۋعا قويىلاتىن تالاپتار قاتاڭداتىلادى.
تاعى ءبىر ماڭىزدى وزگەرىس
ونلاين تۇتىنۋشىلىق نەسيە راسىمدەۋدە 24 ساعاتتىق «ويلانۋ مەرزىمى» ەنگىزىلەدى. ياعني، بانك نەسيە بەرۋدى ماقۇلداعانىمەن، كليەنت اقشانى تەك ءبىر تاۋلىكتەن كەيىن عانا الا الادى.
بۇل وزگەرىستەر نە ءۇشىن قاجەت؟
رۋسلان وماروۆ، ءبىرىنشى كرەديتتىك بيۋرو ديرەكتورى:
- الاياقتىقتى ازايتۋ – الاياقتار نەسيە راسىمدەپ، جىلدام شەشىپ الىپ، ءوز شوتتارىنا اۋدارماۋى ءۇشىن.
- لۋدومانداردى شەكتەۋ – قۇمار ويىندارعا تاۋەلدى ادامداردىڭ شۇعىل اقشا الۋ مۇمكىندىگىن ازايتۋ.
- ازاماتتارعا ويلانۋعا ۋاقىت بەرۋ – كوپشىلىك نەسيەنى ەموسيامەن الادى، سوندىقتان ولار وسى وزگەرىستەر ارقىلى ويلانىپ، سالىستىرىپ، شەشىم قابىلداي الادى.