2025 جىلعى 1 قاڭتاردان باستاپ قازاقستاندا حالىقتى الەۋمەتتىك قورعاۋ سالاسىندا ارناۋلى الەۋمەتتىك قىزمەتتەردى ليسەنزيالاۋ ەنگىزىلەدى.
بۇل ولاردى كورسەتۋ ساپاسىن جاقسارتۋعا جاعداي جاسايدى جانە وسى سالاداعى بۇزۋشىلىقتار سانىن ازايتۋعا وڭ ىقپال ەتەدى. الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتى جۇرگىزگەن ليسەنزيا الدىنداعى تالداۋ ناتيجەلەرى بويىنشا ءااق كورسەتەتىن 1007 ۇيىمنىڭ 72،3% - ى تالاپتارعا سايكەس كەلەتىنى انىقتالدى.
ليسەنزيالاۋدى ەنگىزۋ ارناۋلى الەۋمەتتىك قىزمەتتەر كورسەتۋ جۇيەسىن جاڭعىرتۋ كەزەڭدەرىنىڭ ءبىرى بولىپ تابىلادى جانە ول: كورسەتىلەتىن قىزمەتتەردىڭ ساپاسىن ارتتىرۋعا؛ كورسەتىلەتىن قىزمەتتى الۋشىلاردىڭ قاۋىپسىزدىگى مەن قۇقىقتارىن قورعاۋعا كەپىلدىك بەرۋگە؛ ءااق ۇسىناتىن ۇيىمدار ءۇشىن ءبىرىڭعاي ستاندارتتاردى بەلگىلەۋگە باعىتتالعان.
«وسى قىزمەتتەردى كورسەتەتىن ۇيىمداردىڭ مەنشىك نىسانىنا قاراماستان، ءااق-نىڭ ءتيىستى ساپاسىن قامتاماسىز ەتۋ قاجەتتىگى كوپتەن بەرى تۋىنداپ كەلەدى. بۇل ورايدا وتكەن جىلى ارناۋلى الەۋمەتتىك قىزمەت كورسەتۋ ورتالىقتارىنىڭ بىرىندە مۇگەدەكتىگى بار بالالاردىڭ تاعامنان ۋلانىپ، ءتىپتى ادام شىعىنى ورىن العان قايعىلى وقيعانى ەسكە تۇسىرسەك جەتكىلىكتى. جۇرگىزىلگەن كەشەندى تەكسەرۋ ناتيجەلەرى بويىنشا وسى ۇيىمدا مۇگەدەكتىگى بار بالالاردىڭ قۇقىقتارى ورەسكەل بۇزىلعانى انىقتالدى: تۇرمىستىق قىزمەتتەر تولىق كولەمدە كورسەتىلمەگەن؛ توسەك-ورىن، كيىم جانە اياق كيىم بەرۋدىڭ مينيمالدى نورمالارى ساقتالماعان؛ سكرينينگتىك تەكسەرۋلەر جۇرگىزىلمەگەن؛ تاماقتانۋ نورمالارى بۇزىلعان.
2024 جىلدىڭ 11 ايىندا جۇرگىزىلگەن 167 تەكسەرۋ ناتيجەسىندە 148 سۋبەكتىگە انىقتالعان بۇزۋشىلىقتاردى جويۋ تۋرالى نۇسقاما بەرىلىپ، جالپى سوماسى 1،75 ملن تەڭگەگە 15 ايىپپۇل سالىندى»، – دەدى كوميتەت ءتوراعاسى تولەگەن وسپانقۇلوۆ.
ول ءااق ساپاسى ەكى نەگىزگى فاكتورعا تىكەلەي بايلانىستى ەكەنىن اتاپ ءوتتى: قىزمەتكەرلەردىڭ كاسىبي بىلىكتىلىك دەڭگەيى جانە قىزمەت كورسەتەتىن ۇيىمداردىڭ بەلگىلەنگەن تالاپتارعا سايكەستىگى.
«بۇگىنگى تاڭدا رەسپۋبليكا بويىنشا حالىقتى الەۋمەتتىك قورعاۋ سالاسىندا قىزمەت ەتەتىن 12،7 مىڭ الەۋمەتتىك قىزمەتكەر بار. ولاردىڭ تەك 12%-نىڭ بەيىندىك ءبىلىمى بار، قالعان 88%-ىندا مەديسينالىق، پەداگوگيكالىق، ەكونوميكالىق جانە ت. ب. ءبىلىم بار.
كادرلاردىڭ ساپاسىن ارتتىرۋ ءۇشىن بيىل الەۋمەتتىك قىزمەتكەرلەرگە قويىلاتىن تالاپتاردى بەلگىلەيتىن كاسىپتىك ستاندارت ازىرلەندى. بيىل 8،3 مىڭنان استام الەۋمەتتىك قىزمەتكەر بەيىندىك وقىتۋدان ءوتىپ، سەرتيفيكاتتار الدى. 2025 جىلدان باستاپ الەۋمەتتىك قىزمەتكەرلەردىڭ ءتىزىلىمى ەنگىزىلەدى، وندا ولاردىڭ كاسىبي قۇزىرەتىنە قاتىستى بارلىق دەرەكتەر كورسەتىلەدى. سونداي-اق، كەلەسى جىلدان باستاپ الەۋمەتتىك قىزمەتكەرلەر ەڭبەك جانە حالىقتى الەۋمەتتىك قورعاۋ مينيسترلىگىمەن مەموراندۋمدار جاسالعان مامانداندىرىلعان كافەدرالارى بار رەسپۋبليكانىڭ 14 جوعارى وقۋ ورنىنىڭ بازاسىندا قايتا دايارلاۋدان جانە بىلىكتىلىگىن ارتتىرۋدان وتە الادى.
ال ءااق كورسەتەتىن ۇيىمداردا ءتيىستى جاعدايلار جاساۋ ماسەلەلەرىن شەشۋ ءۇشىن 2025 جىلدان باستاپ ليسەنزيالاۋ ەنگىزىلۋدە»، – دەپ اتاپ ءوتتى كوميتەت ءتوراعاسى.
ليسەنزيا الۋدىڭ نەگىزگى شارتتارىنىڭ ءبىرى رەتىندە مىنالار انىقتالدى: ءااق ۇسىنۋعا جارامدى جانە سانيتارلىق ەرەجەلەرگە، ءورت قاۋىپسىزدىگى ەرەجەلەرىنە سايكەس كەلەتىن عيماراتتىڭ بولۋى؛ كورسەتىلەتىن قىزمەتتەردىڭ ءتيىستى ساپاسىن قامتاماسىز ەتەتىن قاجەتتى ماتەريالدىق-تەحنيكالىق بازانىڭ بولۋى؛ قىزمەتكەرلەر قۇرامىنىڭ بولۋى؛ حالىقتىڭ از قوزعالاتىن توپتارى ءۇشىن عيماراتتاردىڭ قولجەتىمدىلىگىن قامتاماسىز ەتۋ جانە ت. ب.
وسى جىلدىڭ قازان ايىنان باستاپ كوميتەتتىڭ اۋماقتىق دەپارتامەنتتەرى ليسەنزيالاۋ الدىنداعى تالداۋ جۇرگىزۋدە، ونىڭ بارىسىندا ءااق كورسەتەتىن 1007 ۇيىمنىڭ 72،3% ليسەنزيالاۋ شارتتارىنا تولىق سايكەس كەلەتىندىگى انىقتالدى.
جەرگىلىكتى اتقارۋشى ورگاندار مەملەكەتتىك ارناۋلى قىزمەت كورسەتۋ ورتالىقتارىن بەلگىلەنگەن تالاپتارعا سايكەس كەلتىرۋ بويىنشا جۇمىس جۇرگىزۋدە.
بۇل رەتتە ۇەۇ ۇسىناتىن ۇكىمەتتىك ەمەس سەكتور ۇيىمدارىنىڭ ىشىنەن ءورت قاۋىپسىزدىگى اكتىلەرى جوق 86 وبەكت انىقتالدى، 70ء-نىڭ سەس قورىتىندىلارى جوق، 87 ۇيىمنىڭ عيماراتتارىندا مۇگەدەكتىگى بار ادامدار ءۇشىن قولجەتىمدىلىك قاراستىرىلماعان.
«ءبىز اكىمدىكتەرمەن جانە ۇەۇ-مەن ليسەنزيالاۋعا دايىندىق ماسەلەلەرىن پىسىقتاۋدى جالعاستىرامىز، ليسەنزيالاۋ الدىنداعى باقىلاۋدان ءوتۋ بولىگىندە قاجەتتى كونسۋلتاسيالار مەن سۇيەمەلدەۋ كورسەتەمىز. ۇيىمداردى ليسەنزيالاۋ ءبىرىنشى كەزەكتە كورسەتىلەتىن ءااق ساپاسىن قامتاماسىز ەتۋگە مۇمكىندىك بەرەدى، ەكىنشىدەن، مۇگەدەكتىگى بار ادامداردى جانە كورسەتىلەتىن قىزمەتتى الۋشىلاردىڭ وزگە دە ساناتتارىن قوعام ومىرىنە ودان ءارى ىقپالداستىرا وتىرىپ، ولاردى الەۋمەتتىك وڭالتۋدىڭ تيىمدىلىگىن قامتاماسىز ەتەدى»، – دەپ اتاپ ءوتتى تولەگەن وسپانقۇلوۆ.