جىلدار بويى تارالاتىن فەيكتەر بار. ولار مەسسەندجەرلەر مەن الەۋمەتتىك جەلىلەردەگى رەپوستتار مەن تاراتىلىمدار ارقىلى قايتا-قايتا شىعادى.
Stopfake.kz 2024 جىلى كەيبىر ەسكى قاۋەسەتتەر قازنەتكە قايتا تارالعانىن مالىمدەدى، دەپ حابارلايدى aqshamnews.kz.
Martinelli ۆيرۋسى
اقپان ايىندا تانىمال WhatsApp قوسىمشاسىن پايدالانۋشىلارعا تەلەفوندى بۇزاتىن ۆيدەو تۋرالى ەسكەرتۋلەر تۇسە باستادى. ول Martinelli دەپ اتالدى، ال ونداعى ۆيرۋس جۇيەنى قالپىنا كەلتىرە المايتىنداي ەتىپ زاقىمدايدى ەكەن. شىن مانىندە، ەشقانداي Martinelli جوق. ال فەيكتىڭ ءوزى جەلىدە 2017 جىلى تارالدى. ول كەزدە ۇقساس ءماتىن يتالياندىقتار اراسىندا تارالدى.
2023 جىلدىڭ قاڭتارىندا فەيك رەسەيگە جەتتى. ونداعى فاكچەكەرلەر Martinelliء-دى بىرەۋلەر ويدان شىعارعانىن راستادى.
ءبىزدىڭ پورتال Martinelli تۋرالى قاۋەسەتتەردى 2020 جانە 2022 جىلدارى جوققا شىعارعان.
بالالاردى ۇرلاۋ
كوكتەمدە جانە جازدا الەۋمەتتىك جەلىلەردە قوناق ءۇي تۇرعىندارى بولمەدەن جاسىرىن ەسىك تاۋىپ العانى تۋرالى ەسكى فەيك ۆيدەو تارالدى. روليك اۆتورلارىنىڭ پايىمداۋىنشا، بۇل ەسىك ارقىلى بالالاردى ۇرلاپ كەتەدى ەكەن. ق ر سىرتقى ىستەر مينيسترلىگى بۇل قاۋەسەت بىرنەشە جىلدان بەرى تارالىپ جاتقانىن جانە بالاسىن «ۇرلاپ» كەتكەن اتا-انالاردىڭ بايلانىس ءنومىرىن ەشكىم بەرە المايتىنىن حابارلادى.
قۇپيا بولمەنىڭ سىرىن قازاقستاندىق فاكچەكەر Factcheck.kz اشتى. ۆيدەو Holiday Inn Istanbul Old City تۇرىك قوناق ۇيىندە تۇسىرىلگەن. بۇل تەحنيكالىق بولمەگە اپاراتىن ەسىك بولىپ شىقتى.
انتيبيوتيكتەن بولاتىن ءولىم
تامىز ايىندا قازنەتتە «سەفترياكسون» پرەپاراتىن قابىلداعاننان كەيىن ادام قايتىس بولاتىنى تۋرالى فەيك تارادى. بۇل انتيبيوتيك الماتىنىڭ ءدارىحانالارىندا بار جانە ودان 18 ادام كوز جۇمعان ەكەن. حابارلاماعا جالعان دارى-دارمەك جاساعانى ءۇشىن ۇيىمداسقان قىلمىستىق توپ قاماۋعا الىنعانى تۋرالى ۆيدەوروليك تىركەلگەن.
العاش رەت جالعان حابارلاما جەلىدە 2023 جىلدىڭ اقپانىندا شىققان. ق ر دەنساۋلىق ساقتاۋ مينيسترلىگى ونى جالعان دەپ تانىدى. سول جىلدىڭ ماۋسىم ايىندا فەيك اقپارات الەۋمەتتىك جەلىلەردە كوپ تارالدى.
ۆيدەو دا ەسكى. ول 2021 جىلدىڭ 17 قاراشاسىندا ZTB ونلاين-رەسۋرسىندا جاريالانعان. وندا پاندەميا كەزىندە دارى-دارمەكتەردى قولدان جاساۋمەن اينالىساتىن ۇيىمداسقان قىلمىستىق توپ تۋرالى ايتىلادى. ءبىراق روليكتە ناقتى «سەفترياكسون» انتيبيوتيگى مەن قايتىس بولعان 18 ادام تۋرالى اقپارات بولعان جوق.
ۇرى قىز
قازان ايىندا الەۋمەتتىك جەلىلەردە داميرا قۇلماعامبەتوۆا تۋرالى جالعان اقپارات تارادى. بىرەۋلەر ونى باۋكەسپە ۇرى دەيدى. بۇل اقپارات جالعان بولىپ شىقتى. ونىڭ 2023 جىلدىڭ قاڭتارىندا ق ر ىشكى ىستەر مينيسترلىگى جوققا شىعارعان. ونى اباي وبلىسىنىڭ پد كريمينالدىق پوليسيا باسقارماسى تەكسەرگەن.
قىز تۋرالى جالعان اقپاراتتى تۋعان تاتەسى تاراتقان. بۇل تۋرالى قىز ءوزىنىڭ الەۋمەتتىك جەلىلەرىندەگى پاراقشالارىندا جازعان.
ۆيرۋس بار فوتوسۋرەتتەر مەن ۆيدەولار
قىركۇيەك ايىندا WhatsApp-تا مەسسەندجەردەگى فوتوسۋرەتتەر مەن ۆيدەولاردا ۆيرۋس بولاتىنى تۋرالى حابارلاما تارادى. ولاردى اشقاندا تەلەفونعا نەمەسە كومپيۋتەرگە زاقىم كەلەدى ەكەن. سونداي-اق، حابارلامادا دايش تەرروريستىك ۇيىمى مۇشەلەرىنىڭ قوڭىراۋ سوعاتىنى تۋرالى ايتىلدى.
مەسسەندجەرلەردە مەديافايلدار ارقىلى تارالاتىن ۆيرۋستار تۋرالى العاشقى جالعان اقپارات 2022 جىلدىڭ قىركۇيەگىندە شىققان. ونى ق ر ءىىم تەرىسكە شىعاردى. بۇگىندە جالعان اقپارات جاڭارتىلماعان – 2024 جىلى تارالعان اقپارات قازاقستاندىقتارعا ەكى جىل بۇرىن كەلىپ تۇسكەن اقپاراتىمەن بىردەي.