قاجىلىققا بارۋ تالاپتارىنا وزگەرىستەر ەنگىزىلگەنى بەلگىلى.
ەنگىزىلگەن وزگەرىس بويىنشا، الداعى جىلى قاسيەتتى پارىزدى ورىنداۋعا نيەت بىلدىرگەن ادامدار بيىلعى جەلتوقسان ايىنىڭ سوڭىنا دەيىن قاجىلىقتىڭ ەلەكتروندى جۇيەسىنە تىركەلىپ ۇلگەرۋگە ءتيىس، دەپ حابارلايدى Almaty-akshamy.kz
بۇدان بىلاي ەلىمىزدە قاجىلىق ساپارى بويىنشا 17 تۋريستىك فيرما عانا قىزمەت كورسەتەدى. بۇعان قازاقستاندىقتاردىڭ بيىلعى قاجىلىق ساپارى كەزىندە باسى داۋعا قالعانى سەبەپ بولىپ وتىر. بۇل تۋرالى اپن حابارلادى.
ەسكە سالساق، بيىل "ZamZam Qazaqstan" قاجىلىق كومپانياسى ارقىلى ۇلكەن قاجىلىققا اتتانعان 380 ادامنىڭ ۆيزاسى جالعان بولىپ شىققان.
قازاقستان مۇسىلماندارى ءدىني باسقارماسى اتالعان وقيعاعا دەيىن دە "Zam-Zam Qazaqstan" كومپانياسىنىڭ قاجىلارعا قىزمەت كورسەتۋگە قاتىستى ءتيىستى ليسەنزياسى، وسى جىلعى رەسمي قاجىلىق تۋروپەراتورلارى تىزىمىندە جوق ەكەنىن، سول سەبەپتى اتالعان فيرمانىڭ قىزمەتىنە مۇلدەم جۇگىنبەۋ كەرەكتىگى تۋرالى بىرنەشە رەت دابىل قاققان ەدى. سونىمەن قاتار، ءمۇفتيات قاجىلاردى وسىعان دەيىن الداپ، دالادا قالدىرعان اتالعان كومپانيانىڭ زاڭسىز ارەكەتتەرى تۋرالى قۇقىق قورعاۋ ورگاندارىنا شاعىم تۇسىرگەن.
وسى ورايدا، قازاقستان مۇسىلماندارى ءدىني باسقارماسى سەنىمدى، رەسمي رۇقساتى بار كومپانيالارعا جۇگىنۋدى سۇرادى.
"قاجىلىق كونكۋرسىنان وتكەن، ياعني قاجىلىق ساپارىن ۇيىمداستىرۋعا قابىلەتتى دەپ تانىلعان، ءمۇفتيات جاريالاعان تىزىمگە ساي تۋروپەراتورلار قىزمەتىنە جۇگىنۋ قاجەتتىگىن تاعى دا قاپەرگە بەرەمىز. سونىمەن قاتار، "قمدب جالعان قاجىلىق ۆيزالارىن دايىندادى" دەپ جالا جاپقان "Zam-Zam Qazaqstan" كومپانياسىنىڭ ديرەكتورى دانيار يلييەۆتىڭ ۇستىنەن سوتقا شاعىم تۇسىرەتىنىمىزدى جەتكىزەمىز. ولار اللا الدىنداعى پارىزىن وتەيمىن دەپ كەلگەن قاجىلارعا قيانات جاسادى"، - دەلىنگەن قمدب مالىمدەمەسىندە.
بۇدان بىلاي وسىنداي وقيعالاردىڭ الدىن الۋ ماقساتىندا قاسيەتتى پارىزدى وتەۋدىڭ ەرەجەسىنە وزگەرىس ەندى. قازاقستان مۇسىلماندارى ءدىني باسقارماسى ساۋد ارابيانىڭ قاجىلىق جانە ۇمرا مينيسترلىگى الداعى قاجىلىق ماۋسىمى ءۇشىن قازاقستانعا 10 مىڭ ورىن ۇسىنعانىن مالىمدەدى. سونداي-اق ولاردىڭ تالابى بويىنشا بيىل قاجىلىققا ارنالعان ورىندار جەلتوقسان ايىنىڭ سوڭىنا دەيىن تولىق تىركەلگەن ەلدەرگە عانا بەرىلمەك. ياعني، جىل سوڭىنا دەيىن قاجىلىقتىڭ ەلەكتروندى جۇيەسىنە تىركەلىپ، سول جۇيەدەن الىناتىن قىزمەت تۇرلەرىنە، ياعني، قوناق ءۇي، مينا مەن ارافات قىزمەتتەرىنە قاراجاتىن تولەگەن كىسى سانىنىڭ كولەمىنە ساي قازاقستان ازاماتتارى ءۇشىن قاجىلىق ورىندارىنىڭ سانى ايقىن بولماق.
سونىمەن قاتار 2024 جىلى وتانداستارىمىزعا قاجىلىق ساپارى بويىنشا 17 تۋروپەراتور عانا قىزمەت كورسەتۋگە قۇقىلى. ياعني، ىرىكتەلگەن 17 تۋريستىك فيرما قاجىلاردىڭ قاۋىپسىزدىگىنە، قوناق ءۇي جانە تاسىمالداۋعا قاتىستى قاجەتتىلىكتەر مەن قۇجاتتاردى راسىمدەۋگە مىندەتتەلەدى. الدىن الا تىركەلگەن ازاماتتار قانداي دا ءبىر جاعدايمەن قاجىلىققا بارا المايتىن بولسا، كەلىسىمشارت بويىنشا ورنىنا باسقا ادامدى جىبەرۋگە نەمەسە قاراجاتتى قايتارىپ الۋعا قۇقىلى.
"كەلىسىمشارت تۇزەدى. كەلىسىمشارت تۇزگەن كەزدە ونىڭ شارتتارى كورسەتىلەدى. 15 كۇن قالعان كەزدە قاراجاتتىڭ بەلگىلى ءبىر پايىزى قايتارىلادى. 10 كۇن قالعان كەزدە ءتىپتى قايتارىلمايدى دەگەندەي كورسەتىلەدى. ويتكەنى 10 كۇن قالعان كەزدە ۆيزا بەرەتىن پورتالدار جابىلىپ قالادى. ءسىزدىڭ ورنىڭىزعا باسقا ادامدى جىبەرۋ مۇمكىندىگى بولماي قالادى. سول كەزدە عانا قاراجات قايتارىلمايدى. ال وعان دەيىن ورىنعا باسقا ادامدى جىبەرۋ مۇمكىندىگى بولىپ تۇرعان كەزدە قاراجات تولىق كايتارىلادى"، – دەپ ءتۇسىندىردى قمدب قاجىلىق ءبولىمىنىڭ مەڭگەرۋشىسى ءجاندىللا بەكجىگىتوۆ.
جەلتوقسان ايىنىڭ باسىندا "قاجىلىق-2024" ماۋسىمىن ۇيىمداستىرۋ، قاجىلىقتىڭ جاڭا تالاپتارىن جان-جاقتى ناسيحاتتاۋعا بايلانىستى ەلىمىزدىڭ تۋريستىك كومپانيالارىمەن ارنايى جيىن ءوتتى. وعان قمدب قاجىلىق بولىمىنە جاۋاپتى قىزمەتكەرلەر مەن قاجىلىق ماۋسىمىن ۇيىمداستىرۋعا رۇقسات العان 17 تۋروپەراتور باسشىلارى مەن وكىلدەرى قاتىستى. جيىندا نايب ءمۇفتي ەرشات وڭعار ۇلكەن قاجىلىق ساپارىن ۇيىمداستىرۋدا ساۋد ارابيا كورولدىگى قاجىلىق جانە ۇمرا مينيسترلىگىنىڭ بەلگىلەگەن تالاپتارى مەن شارتتارى تولىق ساقتالىپ، كورسەتىلگەن مەرزىمدەرگە سايكەس جۇمىس اتقارىلۋى قاجەت ەكەنىن اتاپ ءوتتى.
جالپى قاجىلىق ۆيزاسى – زامان تالابىنا ساي ءارى كوپشىلىكتىڭ مۇددەسى مەن قاجەتتىلىكتەرىنە وراي ساۋد ارابيا كورولدىگىنىڭ قويعان تالابى جانە زاڭى. بۇل مۇسىلمانداردىڭ مۇددەسى ءۇشىن قابىلدانعان شارا.
ماسەلەن، الەمدە ەكى ميللياردقا جۋىق مۇسىلمان بار ەكەنىن ەسكەرسەك، ونىڭ شامامەن 60 ميلليونىنا (جاعدايى جەتكەندەرگە) قاجىلىق جاساۋعا رۇقسات ەتىلسە، وندا ءال-حارام مەشىتى، ارافات تاۋى، مينا جازىعى سىندى قاجىلىق ءراسىمىن ورىندايتىن جەرگە ادام سىيماي كەپتەلىسكە ۇشىراپ، قاجىلارعا لايىقتى قىزمەت كورسەتىلمەي قالادى. ونىڭ سالدارى قاجىلارعا ۇلكەن زيان تيگىزۋمەن قاتار، قايعىلى جاعدايدىڭ ورىن الۋىنا دا اپارۋى مۇمكىن. سول ءۇشىن ساۋد ارابيا مەملەكەتى قاجىلىقتى تەك رۇقساتپەن (ۆيزامەن) عانا ورىنداۋعا ارنايى زاڭ قابىلدادى. مۇنىڭ نەگىزگى ماقساتى قاجىلاردىڭ قاۋىپسىزدىگىن قامتاماسىز ەتۋ ءارى بىر-بىرىنە زيان تيگىزبەيتىندەي ەتىپ قۇلشىلىقتارىن اتقارتۋ.
سونىمەن قاتار ساۋد ارابيا مەملەكەتى قاجىلىق جانە ۇمرا مينيسترلىگى ءار مەملەكەتكە بەرىلگەن كۆوتاعا سايكەس، قاجىلاردىڭ تۇراقتايتىن ورنىن، ىشىپ-جەيتىن اسىن، جۇرەتىن كولىگىن ەسەپتەپ، ازىرلەيدى.