الماتى اكىمى ەربولات دوسايەۆ تۇركسىب اۋدانىنىڭ تۇرعىندارىمەن كەزدەسۋ بارىسىندا ولاردى ساپالى اۋىز سۋمەن قامتاماسىز ەتۋ جانە كارىز جەلىلەرىن سالۋ بويىنشا قابىلدانىپ جاتقان شارالار تۋرالى باياندادى، دەپ حابارلايدى aqshamnews.kz
2024 جىلدىڭ شىلدە ايىندا «المەرەك» شاعىن اۋدانىندا 20 كم سۋ قۇبىرى جانە كارىز جەلىلەرىنىڭ قۇرىلىسى اياقتالدى. بيىلعى جىلدىڭ قازان ايىنىڭ سوڭىنا دەيىن شاعىن اۋدانداعى 400 ءۇيدى جاڭا جەلىلەرگە قوسۋ جوسپارلانعان.
سونداي-اق، بيىل قازان ايىندا «جاس قانات» شاعىن اۋدانىندا 8 كم سۋ قۇبىرى جانە 8،6 كم كارىز جەلىلەرى سالىندى. بۇعان دەيىن تۇرعىندار اۋىز سۋدى ۇڭعىمالاردان الىپ كەلگەن. قازىرگى ۋاقىتتا سوڭعى ىسكە قوسۋ-جوندەۋ جۇمىستارى اياقتالۋدا، قازان ايىنىڭ سوڭىنا دەيىن جەلىلەر ىسكە قوسىلادى.
سونىمەن قاتار، زاكارپاتسكايا كوشەسىندە 4،8 كم سۋ قۇبىرى جانە 1،6 كم كارىز جەلىلەرىن سالۋ جۇمىستارى اياقتالدى. بيىلعى جىلدىڭ قاراشا ايىنىڭ سوڭىنا دەيىن ەكى كارىز سورعى ستانسياسىن (كسس) ورناتىپ، تۇرعىنداردى جەلىلەرگە قوسۋ كوزدەلگەن.
بۇعان قوسا، «تومەنگى بەسجىلدىق» شاعىن اۋدانىندا 115 كم سۋ قۇبىرى جانە 32 كم كارىز جەلىلەرى سالىنىپ جاتىر.
جۇمىستى بيىل اياقتاۋ جوسپارلانىپ وتىر.
«2024 جىلدىڭ قىركۇيەك ايىندا «قايرات» شاعىن اۋدانىندا سۋ جانە كارىز جەلىلەرىنىڭ ەكىنشى كەزەڭىن سالۋ بويىنشا مەردىگەر انىقتالدى، بۇل بۇرىن سۋمەن جانە كارىزبەن قامتىلماعان ۋچاسكەلەردى تولىق قامتاماسىز ەتۋگە مۇمكىندىك بەرەدى. بۇل جۇمىس 2025 جىلدىڭ قىركۇيەك ايىندا اياقتاۋ جوسپارلانۋدا»، - دەدى ەربولات دوسايەۆ.
قالا اكىمى «شۋاقتى» شاعىن اۋدانىندا كارىز سورعى ستانسياسى (كسس) سالىنىپ جاتقانىن حابارلادى، بۇل ۆولوچايەۆسكايا كوشەسىندەگى 70 ءۇيدىڭ كارىز ماسەلەسىن شەشۋگە مۇمكىندىك بەرەدى. جۇمىس 2024 جىلدىڭ جەلتوقسان ايىندا اياقتالادى.
سونىمەن قاتار، «ۆوكزال» قازاندىعىنا 3،4 كم سۋ قۇبىرى جانە 7،3 كم ەلەكتر جەلىلەرى تارتۋ جۇمىستارى اياقتالدى.
وسىلايشا، بۇل جوبالار تۇركسىب اۋدانىنىڭ 21 مىڭنان استام تۇرعىنىن ساپالى اۋىز سۋمەن قامتاماسىز ەتۋگە مۇمكىندىك بەرەدى، دەپ ءسوزىن تۇيىندەدى الماتى اكىمى.
ايتا كەتەيىك، ەربولات دوسايەۆتىڭ تاپسىرماسى بويىنشا 2024 جىلدىڭ 9 ايىندا الماتى قالاسىنىڭ سۋ جانە كارىز جۇيەلەرى سالاسىندا 219 كم جاڭا جەلى سالىندى جانە 27،3 كم ەسكى جەلى جاڭعىرتىلدى.
قابىلدانىپ جاتقان شارالار 2025 جىلى سۋ قۇبىرى جەلىلەرىنىڭ توزۋىن 53،5%-عا، كارىز جەلىلەرىنىڭ توزۋىن 55،2%-عا دەيىن تومەندەتۋگە مۇمكىندىك بەرەدى.