2024 جىلعى تالاسبەك سىيلىعىنىڭ لاۋرەاتتارى بەلگىلى بولدى. بۇل مادەني شارا قازاق ادەبيەتى مەن كۇي ونەرىنىڭ شوقتىعى بيىك تۋىندىلارىن دارىپتەۋگە ارنالعان ەرەكشە كەشپەن ەستە قالدى. كۇي مەن پوەزيا سالاسىنداعى شىعارماشىلىقتىڭ تاماشا كورىنىسى رەتىندە وتكەن بۇل شاراعا قاتىسۋشىلاردىڭ، دەمەۋشىلەردىڭ جانە ۇيىمداستىرۋشىلاردىڭ ەڭبەگى زور، دەپ حابارلايدى aqshamnews.kz.
شارا بارىسىندا كۇي ونەرىنە ەرەكشە ءمان بەرىلدى. تالاسبەك اسەمقۇلوۆ اتىنداعى IV رەسپۋبليكالىق كۇيشىلەر بايقاۋىنا قاتىسقان ادەبيەتشىلەر مەن دومبىراشىلاردىڭ ونەرى كورەرمەندەرگە اسەرلى ساتتەر سىيلادى. بايقاۋدىڭ جەڭىمپازدارى رەتىندە ءىلياس تۇرسىنبەك (1-ورىن)، ارمان جانىبەكوۆ (2-ورىن)، قايروللا سۇڭقار (3-ورىن) ماراپاتتالدى.
«تالاسبەك» سىيلىعىنىڭ «ۇزدىك ادەبي تۋىندى» نوميناسياسى بويىنشا جەڭىمپاز اتانعان ءتوقتارالى تاڭجارىقتىڭ "سەن وسى قالادا جۇرگەن سەكىلدىسىڭ" اتتى ولەڭى پوەزيا الەمىنىڭ جاڭا بەلەسىنە شىقتى. بۇل شىعارماعا قازىلار القاسى ەرەكشە باعا بەرىپ، ونى پوەزيانىڭ بيىك دەڭگەيىنە تەڭەدى. ماسەلەن، زيرا ناۋرىزبايەۆا ءتوقتارالىدىڭ تۋىندىسىن "ءتورت ساتىدان وتكەن، ءبىر روماننىڭ جۇگىن ارقالاعان دۇنيە" دەپ باعالاسا، مادينا وماروۆا "جوعارى دەڭگەيدەگى پوەزيا ۇلگىسى" دەپ تانىدى.
ءتوقتارالى تاڭجارىقتىڭ بۇل ولەڭى قالامگەردىڭ كۇردەلى ءارى تەرەڭ شىعارماشىلىق الەمىن كورسەتەدى. ونىڭ شىعارمالارى وقىرماندى ويلانۋعا، الەمدى باسقا قىرىنان قاراۋعا جەتەلەيدى. جاسامپازدىق پەن شىعارماشىلىق رۋحتى بەينەلەگەن بۇل كەش قازاق ادەبيەتى مەن كۇي ونەرىن ناسيحاتتاۋ جولىنداعى ماڭىزدى قادام بولدى.
شاراعا قاتىسۋشىلاردىڭ، ۇيىمداستىرۋشىلاردىڭ، كورەرمەندەردىڭ جانە قوناقجايلىلىق تانىتقان كىتاپحانا ۇجىمىنىڭ ەڭبەگى ەلەۋلى ۇلەس قوستى.