2024 جىلعى 1 قازاننان باستاپ كوللەكتورلار قارىزدى ءوندىرىپ الۋ كەزىندە قارىز الۋشىمەن كەلىسىمگە كەلۋ ءتارتىبىن ۇستانۋى ءتيىس، دەپ حابارلايدى aqshamnews.kz.
جاڭا ەرەجەلەرگە سايكەس، كوللەكتورلار قارىز الۋشىعا ونىڭ مىندەتتەمەلەردى ورىنداۋ شارتتارىن وزگەرتۋگە ءوتىنىش بەرۋ قۇقىعى تۋرالى حابارلاۋى كەرەك:
2024 جىلعى 1 قازانعا دەيىن ساتىپ الىنعان قارىزدار بويىنشا – 20 كۇن ىشىندە؛
2026 جىلعى 1 مامىردان كەيىنگى جاڭا قارىزدار بويىنشا – 30 كۇن ىشىندە بانكتىك قارىز نەمەسە ميكروكرەديت شارتى بويىنشا قۇقىقتار الىنعان ساتتەن باستاپ حابارلانۋى ءتيىس.
سونىمەن قاتار، قارىز الۋشىلاردىڭ قۇقىقتارى كەڭەيتىلدى. ەندى قارىز الۋشىلار كوللەكتورلىق اگەنتتىككە كەز كەلگەن ۋاقىتتا قارىزدى رەتتەۋ بويىنشا ءوز ۇسىنىستارىن ەنگىزە الادى. بۇل ۇسىنىستار كەلەسى شارتتاردى قامتۋى مۇمكىن:
نەگىزگى قارىزدى نەمەسە سىياقىنى تولەۋدى كەيىنگە قالدىرۋ نەمەسە ءبولىپ تولەۋ؛
قارىزدى وتەۋ كەزەكتىلىگىن وزگەرتۋ، سونىڭ ىشىندە نەگىزگى قارىزدى باسىم تۇردە وتەۋ؛
قارىز مەرزىمىن وزگەرتۋ؛
ايىپپۇلدار مەن ءوسىمپۇلداردى قىسقارتۋ نەمەسە تولىعىمەن جويۋ؛
بانكتىك قارىزدى وتەۋگە قاتىستى كوميسسيالاردى ازايتۋ نەمەسە الىپ تاستاۋ؛
نەگىزگى قارىز جانە/نەمەسە سىياقى بويىنشا تولىق نەمەسە ءىشىنارا كەشىرۋ؛
جىلجىمايتىن مۇلىكتى ءوز بەتىنشە ساتۋ ارقىلى قارىزدى وتەۋ؛
قامتاماسىز ەتىلگەن مۇلىكتى كوللەكتورلىق اگەنتتىككە بەرۋ ارقىلى مىندەتتەمەنى وتەۋ.
قارىز الۋشىنىڭ وتىنىشىندە مىندەتتەمەلەردى ورىنداماۋ سەبەپتەرى كورسەتىلۋى ءتيىس جانە كىرىستەردىڭ ازايعانىن نەمەسە مىندەتتەمەلەردى ورىنداۋ مۇمكىن ەمەستىگىن راستايتىن قۇجاتتار قوسا بەرىلەدى.
ءوز كەزەگىندە، كوللەكتورلار وتىنىشكە 15 كۇن ىشىندە جاۋاپ بەرۋگە مىندەتتى. ولار قارىز الۋشىنىڭ ۇسىنىستارىمەن كەلىسۋى، قارسى ۇسىنىس جاساۋى نەمەسە دالەلدى تۇردە باس تارتۋى مۇمكىن.
كوللەكتورلىق اگەنتتىك شەشىم قابىلداعان كەزدە ىشكى قۇجاتتارعا سۇيەنەدى، وندا قارىز الۋشىلاردىڭ كاتەگوريالارى (مىسالى، رەسمي جۇمىسسىزدار نەمەسە الەۋمەتتىك وسال توپتار) جانە قاجەتتى قۇجاتتار ءتىزىمى مەن قارىز جۇكتەمەسىن ازايتۋ شارالارى كورسەتىلۋى كەرەك.
بۇل اقپارات كوللەكتورلىق اگەنتتىكتىڭ رەسمي سايتىندا ورنالاستىرىلۋى قاجەت.
«نەسيە بەرۋ كەزىندە تاۋەكەلدەردى ازايتۋ، قارىز الۋشىلاردىڭ قۇقىقتارىن قورعاۋ، قارجى نارىعىن جانە ورىنداۋ ءوندىرىسىن رەتتەۋدى جەتىلدىرۋ تۋرالى كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭعا مەملەكەت باسشىسى 2024 جىلعى 19 ماۋسىمدا قول قويعانىمەن، ول بىرتىندەپ كۇشىنە ەنەدى.