سۋ رەسۋرستارى جانە يرريگاسيا مينيسترلىگىنىڭ باسسەيندىك ينسپەكسيالارى وتكەن جىلى سۋ زاڭناماسىنىڭ تالاپتارىن ساقتاۋ بويىنشا 64 تەكسەرىس جۇرگىزدى.
ناتيجەسىندە، 129 بۇزۋشىلىق انىقتالدى. اتاپ ايتقاندا، سۋ وبەكتىلەرىن زاڭسىز باسىپ الۋ، رۇقسات ەتىلگەن كولەمنەن ارتىق سۋ الۋ، سۋ شارۋاشىلىعى قۇرىلىستارى پايدالانۋ ەرەجەلەرىن بۇزۋ، زاڭسىز سۋ ۇڭعىمالارىن بۇرعىلاۋ جانە جەراستى سۋلارىن الۋ قۇرىلىستارىن سالۋ، سۋدى باستاپقى ەسەپكە الۋ ءتارتىبىن بۇزۋ جانە ەسەپكە الۋ دەرەكتەرىن بۇرمالاۋ سىندى ءبىرقاتار بۇزۋشىلىقتار تىركەلدى.
انىقتالعان بۇزۋشىلىقتاردى جويۋ بويىنشا 56 ۇيعارىم بەرىلىپ، 63 اكىمشىلىك ءىس سوتقا جىبەرىلدى. بۇگىنگى كۇنگە سۋ زاڭناماسىن بۇزعانداردان 11 ملن تەڭگەدەن استام قاراجات ءوندىرىلدى.
ەلىمىزدە سۋ رەسۋرستارىن قورعاۋ ماسەلەسى وتە وزەكتى. سۋدىڭ «قارا نارىعىن» جويۋ جانە ونىڭ شىعىنىن باقىلاۋدى قامتاماسىز ەتۋ ءۇشىن سۋ رەسۋرستارى جانە يرريگاسيا مينيسترلىگى باسسەيندىك ينسپەكسيا شتاتىن 1،5 ەسە كوبەيتتى. ەگەر بۇرىن باسسەيندىك ينسپەكسيا قىزمەتكەرلەرىنىڭ سانى 98 ادام بولسا، ءقازىر جالپى شتات سانى 242 ادام. بۇدان بولەك، جاڭا سۋ كودەكسىندە باسسەيندىك ينسپەكسيالارعا قاداعالاۋ فۋنكسيالارىن دا بەرۋ كوزدەلگەن. ال كاسىپكەرلىك كودەكس سۋ رەسۋرستارىن باسقارۋ ورگاندارى جەدەل دەن قويۋ شارالارىن قابىلداي الاتىن نورمالارمەن تولىقتىرىلاتىن بولادى.