قارا التىن ءوندىرۋ جوسپارى – 90،5 ملن توننا.
كەلەر جىلى قازاقستاندا مۇناي ءوندىرىسىنىڭ كولەمى ارتا تۇسەدى دەپ جوسپارلانىپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بيىلعى جىل قورىتىندىسى بويىنشا مۇناي ءوندىرۋ كولەمى – 84 ملن توننا. بۇل – وتكەن جىلدىڭ كورسەتكىشىمەن سالىستىرعاندا 96،5%. مۇناي ءوندىرۋدىڭ تومەندەۋى قاشاعان كەن ورنىنداعى «بولاشاق» زاۋىتىنداعى جوسپاردان تىس جوندەۋ جۇمىستارىنا، قاراشىعاناقتان گاز جەتكىزىلەتىن ورىنبور گاز وڭدەۋ زاۋىتىنىڭ توقتاۋىنا، سونداي-اق كاسپيي قۇبىر كونسورسيۋمىنداعى جوندەۋ جۇمىستارىنا بايلانىستى بولدى. ولار 64،8 ملن توننا دەڭگەيىندەگى مۇناي ەكسپورتىنا تەرىس اسەر ەتتى، وتكەن جىلعى دەڭگەيدەن 4،1%-عا تومەن»، - دەدى ەنەرگەتيكا ءمينيسترى بولات اقشولاقوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
مينيستر كەلتىرگەن مالىمەت بويىنشا، 2023 جىلعا ارنالعان مۇناي ءوندىرۋ جوسپارى – 90،5 ملن توننا، ال ەكسپورت كولەمى – 71 ملن توننا.
«مۇناي ءوندىرۋ سالاسىندا ءىرى جوبالاردى ىسكە اسىرۋ بويىنشا ەلىمىزدىڭ 3 نەگىزگى كەن ورنىندا جۇمىس جالعاسادى. تەڭىز كەن ورنىندا مۇناي ءوندىرۋدى جىلىنا 12 ملن تونناعا ۇلعايتۋعا مۇمكىندىك بەرەتىن جوبا ىسكە اسىرىلىپ جاتىر. بيىل جوبا بويىنشا جۇمىستىڭ جالپى ىلگەرىلەۋى – 95،2%. جوبانى 2024 جىلى اياقتاۋ جوسپارلانىپ وتىر. 2023 جىلى تەڭىزدە ۇڭعىما ەرنەۋىنىڭ قىسىمىن باسقارۋ جوباسى اياقتالادى. ول كەلەشەكتە كەن ورنىندا جۇمىس ىستەيتىن زاۋىتتاردىڭ وڭدەۋ قۋاتتارىنىڭ تولىق جۇكتەلۋىن قامتاماسىز ەتەدى»، - دەيدى مينيستر.