جاڭا جىلدان باستاپ بالا كۇتىمىنە بايلانىستى جاردەماقى الۋشىلارعا جاردەماقى تولەۋ مەرزىمى اۆتوماتتى تۇردە ۇزارتىلادى.
مەملەكەت باسشىسى «ق ر كەيبىر زاڭنامالىق اكتىلەرىنە مەملەكەتتىك جاستار ساياساتى جانە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى دەپ حابارلايدى Almaty-akshamy.kz
«زاڭ جوباسىنا قول قويىلعاننان كەيىن، 2023 جىلعى 1 قاڭتارداعى جاعداي بويىنشا، بالا كۇتىمىنە بايلانىستى جاردەماقى الۋشىلارعا جاردەماقى تولەۋ مەرزىمى مەملەكەتتىك ورگانداردىڭ اقپاراتتىق جۇيەلەرىندە بار مالىمەتتەر نەگىزىندە اۆتوماتتى تۇردە ۇزارتىلادى»، – دەپ ناقتىلادى ەڭبەك جانە حالىقتى الەۋمەتتىك قورعاۋ ۆيسە-مينيسترى نازگۇل ساعىندىقوۆا.
1،5 جاسقا دەيىنگى بالالارى بار جۇمىس ىستەمەيتىن اتا-انالار ءۇشىن رەسپۋبليكالىق بيۋدجەتتەن جاردەماقىنىڭ ەكى ءتۇرى تولەنەتىن بولادى.
ءبىرىنشى – بالا تۋعاندا بەرىلەتىن ءبىرجولعى جاردەماقى. بۇعان 2023 جىلعا 65،8 ملرد تەڭگە كوزدەلگەن. 2022 جىلى ءبىرىنشى، ەكىنشى، ءۇشىنشى بالا تۋعاندا بەرىلەتىن جاردەماقى مولشەرى 120 840 تەڭگەنى (38 اەك)، ءتورتىنشى جانە ودان دا كوپ بالا تۋعاندا 200 340 تەڭگەنى (63 اەك) قۇرادى.
ەكىنشى – ءبىر جارىم جاسقا دەيىنگى بالا كۇتىمى بويىنشا جاردەماقى. تۋعان بالانىڭ كەزەكتىلىگىنە بايلانىستى سارالانعان مولشەردە بەرىلەدى. بۇل ماقساتقا 2023 جىلى 43،8 ملرد تەڭگە قاراستىرىلعان.
جۇمىس ىستەيتىن اتا-انالار ءۇشىن رەسپۋبليكالىق بيۋدجەتتەن بالا تۋعان بەرىلەتىن ءبىرجولعى جاردەماقى جانە مەملەكەتتىك الەۋمەتتىك ساقتاندىرۋ قورىنان 1،5 جاسقا دەيىنگى بالا كۇتىمى بويىنشا الەۋمەتتىك تولەم تولەنەتىن بولادى. ايتا كەتەيىك، الەۋمەتتىك تولەم مولشەرى كەيىنگى ەكى جىلدا الەۋمەتتىك اۋدارىمدار جۇرگىزىلگەن ورتاشا ايلىق تابىستىڭ 40 پايىزىن قۇرايدى.