مالايزيامەن كەلىسسوزدەر جۇرگىزىلۋدە.
الماتى قالاسى اكىمىنىڭ ورىنباسارى الىشەر ءابدىقادىروۆ وڭىرلىك كوممۋنيكاسيالار قىزمەتىندە وتكەن بريفينگتە كەلەسى جىلى شەت مەملەكەتتەرگە جاڭا اۋە رەيستەرىن اشۋ جوسپارلانىپ وتىرعانىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى ۋاقىتتا پاكىستانعا، ساۋد ارابياسىنا، جاپونياعا جانە يزرايلگە جاڭا اۋە رەيستەرىن اشۋ بويىنشا كەلىسسوزدەر جۇرگىزىلۋدە. كەلەسى جىلدىڭ باسىندا SCAT كومپانياسى پاكىستان-يسلاماباد جانە كاراچ قالالارىنا ءىرى رەيستەردى اشادى. ساۋد ارابيانىڭ اۋە كومپانياسىنىڭ وكىلدەرى تىكەلەي تۇراقتى رەيستەردىڭ اشىلعانىن حابارلادى. قازاقستان مەن جاپونيا اراسىنداعى تىكەلەي اۋە قاتىناسىن قالپىنا كەلتىرۋ كەلىسسوزدەر ساتىسىندا. سونىمەن قاتار، مالايزيامەن كەلىسسوزدەر جۇرگىزىلۋدە. تۋريستىك باعىت رەتىندە الماتىنىڭ كولىكتىك قولجەتىمدىلىگى ايتارلىقتاي جاقسارادى دەپ كۇتەمىز، بۇل تىكەلەي رەيستەردى اشۋ ارقىلى قولجەتىمدى»، - دەدى الىشەر ءابدىقادىروۆ.
بۇعان دەيىن الماتى مەن قىتايدىڭ سيان قالاسىنىڭ اراسىندا ۇشاق قاتىنايتىنىن جازعان بولاتىنبىز.
سونىمەن قاتار، قازاقستاننان سەيشەل ارالدارىنا العاش رەت تىكەلەي رەيس اشىلعانى تۋرالى ايتىلعان ەدى.