الماتىداعى «كامەنسكوە پلاتو» شاعىن اۋدان تۇرعىندارىن سۋمەن قامتاماسىز ەتۋدىڭ كوپجىلدىق پروبلەماسى 2023 جىلدىڭ سوڭىنا دەيىن شەشىلەدى
2023 جىلى الماتىدا 231 شاقىرىم سۋمەن جابدىقتاۋ، سۋ بۇرۋ جانە جىلۋمەن جابدىقتاۋ جەلىلەرى سالىنىپ، جاڭعىرتىلدى. 13 كارىز سورعى ستانسياسى سالىندى. ەكى قازاندىقتى رەكونسترۋكسيالاۋ ارقاسىندا «يۋجنايا» قازاندىعىنىڭ قۋاتى 1،5 ەسەگە جانە «پرەمەرا» قازاندىعىنىڭ قۋاتى 2 ەسەگە ۇلعايدى. بۇل تۋرالى وكق بريفينگىندە الماتى اكىمى ەربولات دوسايەۆ مالىمدەدى.
«جايلى قالالىق ورتانى قالىپتاستىرۋدىڭ ماڭىزدى بولىگى- قالا تۇرعىندارىن ساپالى كوممۋنالدىق قىزمەتتەرگە قولجەتىمدى ەتۋ. جۇرگىزىلگەن جۇمىستاردىڭ ارقاسىندا 2023 جىلى سۋمەن جابدىقتاۋ جەلىلەرىنىڭ توزۋى 2022 جىلعى 55،7% - دان 54،3% - عا دەيىن تومەندەدى»، - دەپ اتاپ ءوتتى ول.
الماتى اكىمىنىڭ ايتۋىنشا، بيىلعى جازدا اپتاپ ىستىقتان مەدەۋ اۋدانىنىڭ جوعارعى بولىگىندە سۋمەن قامتاماسىز ەتۋ بويىنشا ەلەۋلى پروبلەمالار انىقتالدى. شىلدە ايىندا مەدەۋ اۋدانىندا سۋ تاپشىلىعى تاۋلىگىنە 20 مىڭ م3 قۇرادى.
«سۋ تاپشىلىعىن جويۋ ءۇشىن قۋاتى تاۋلىگىنە 32 مىڭ م 3 بولاتىن سۋمەن جابدىقتاۋدىڭ رەزەرۆتىك سىزباسى جاسالىپ، 2024 جىلدىڭ ماۋسىم ايىندا اياقتالادى. سۋدىڭ نەگىزگى كوزدەرى - تالعارداعى جەر استى سۋلارى. سورعى ستانسيالارىنىڭ قۋاتىن 60% - عا ارتتىرا وتىرىپ، 6 جاڭا سكۆاجينا ب جاسالدى. ال 2023 جىلدىڭ سوڭىنا دەيىن «كامەنسكوە پلاتو» شاعىن اۋدانىنىڭ تۇرعىندارىن سۋمەن جابدىقتاۋدىڭ كوپجىلدىق ماسەلەسى 7 سۋ قويماسىن، ونىڭ ىشىندە 6،9 مىڭ م 3-كە 5 رەزەرۆۋار سالۋ ارقىلى شەشىلەتىن بولادى»، - دەدى ەربولات دوسايەۆ.