الماتىدا اعىمداعى جىلدىڭ 11 ايىندا 203،9 شاقىرىم سۋمەن جابدىقتاۋ جانە كاناليزاسيا جەلىلەرى سالىندى.
بۇل تۋرالى الماتى قالاسىنىڭ اكىمى ە.دوسايەۆ مەملەكەت باسشىسىنىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا ايتتى، دەپ حابارلايدى اlmaty-akshamy.kz.
2023 جىلى قارعالى وزەنىندە سۋ تارتقىش قۇرىلىسى اياقتالىپ (50 مىڭ ادامدى قامتۋ)، «ەرمەنساي» سۋ تارتقىشىنىڭ جوبالاۋ-سمەتالىق قۇجاتتاماسى تۇزەتىلەدى، اقساي وزەنىندەگى سۋ تارتقىشتىڭ قۇرىلىسى جالعاسادى (100 مىڭ ادام). بۇل وبەكتىلەر پايدالانۋعا بەرىلگەن كەزدە، قالانىڭ 170 مىڭ تۇرعىنى ساپالى سۋمەن قامتاماسىز ەتىلەدى. بۇدان باسقا، شامامەن 170 مىڭ تۇرعىندى قامتي وتىرىپ، 217 شاقىرىم جاڭا سۋمەن جابدىقتاۋ جانە سۋ بۇرۋ جەلىسى سالىنادى.
"سونداي-اق 540 مىڭ تۇتىنۋشىنى قامتيتىن 2 پودستانسيا: «الماگۇل»، «تۇزدىباستاۋ» پودستانسيالارى مەن ەلەكتر جەلىلەرىنىڭ قۇرىلىسى اياقتالادى. 450 مىڭ تۇتىنۋشىنى جىلۋمەن قامتاماسىز ەتۋ ماقساتىندا 2023 جىلى 2 قازاندىقتى: «وڭتۇستىك اۋداندىق قازاندىعى» مەن «پرەمەرا» قازاندىعىن رەكونسترۋكسيالاۋ جۇمىستارى اياقتالادى. بۇل رەتتە، توزۋ دەڭگەيىن تومەندەتۋ ءۇشىن جىلۋ جەلىلەرىن رەكونسترۋكسيالاۋ كولەمى الداعى جىلى 15 شاقىرىمعا دەيىن 3 ەسە ۇلعايادى" - دەدى ە.دوسايەۆ.
ينجەنەرلىك جەلىلەردىڭ توزۋىن ەداۋىر تومەندەتۋ ءۇشىن كوممۋنالدىق قىزمەتتەردى كورسەتۋ ساپاسىن جاقسارتۋ ماقساتىندا 2023 جىلدان باستاپ ءۇش جىلدىڭ ىشىندە «ينۆەستيسيالارعا ايىرباستاۋ ءتاريفى» جاڭا تاريفتىك ساياساتى كەزەڭ-كەزەڭىمەن ەنگىزىلەدى.
"بارلىق وڭىرلەر ءۇشىن ماڭىزدى ماسەلەگە توقتالعىم كەلەدى. بۇگىندە الماتىدا جوبالاۋ جانە قۇرىلىس كەزىندە ءجيى بولاتىن قاتەلىكتەردەن ينجەنەرلىك جەلىلەردە جۇكتەمە ارتادى. قازاقستاننىڭ Doing business-تەگى رەيتينگىن جاقسارتۋ شەڭبەرىندە 2016 جىلدان باستاپ جوبالاردى كەلىسۋ كەزەڭى الىنىپ تاستالدى، ناتيجەسىندە ينجەنەرلىك جەلىلەر جۇيەسىندە تەڭگەرىمسىزدىك پايدا بولدى. ءقازىر بۇل تەك الماتى قالاسىنىڭ عانا ەمەس، باسقا وڭىرلەردىڭ دە باستى پروبلەماسىنا اينالىپ وتىر" - دەدى شاھار باسشىسى..
وسى جاعدايدان شىعۋ ءۇشىن ينجەنەرلىك جەلىلەرگە قوسىلۋ بويىنشا جوبالىق شەشىمدەردى كەلىسۋ كەزەڭىن قايتا باستاۋ ۇسىنىلادى.