جۇيە مەملەكەتتىك قىزمەتكە ىرىكتەۋ پروسەسىنىڭ بارلىق كەزەڭدەرىن اۆتوماتتاندىرادى.
بۇل تۋرالى ق ر مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى بەرىك بەركىمبايەۆ ايتتى، دەپ حابارلايدى Almaty-akshamy.kz
«پرەزيدەنت جارلىعى مەملەكەتتىك قىزمەت ىستەرى اگەنتتىگىنە بىرنەشە ماقساتتى جۇكتەپ وتىر. ول الدىمەن – «ە-قىزمەت» اقپاراتتىق جۇيەسىنىڭ بازاسىندا مەملەكەتتىك قىزمەتكە ىرىكتەۋ جانە قابىلداۋ پروسەسىن تولىقتاي سيفرلاندىرۋدى، سونداي-اق ونى بارلىق مەملەكەتتىك ورگانداردا ەنگىزۋدى جانە كەڭىنەن تاراتۋدى قامتاماسىز ەتۋ. وتكەن جىلدىڭ وزىندە مەملەكەتتىك قىزمەتكە كەلۋ ءۇشىن تەستىلەۋگە قاتىسقانداردىڭ 50 پايىزدان استامى عانا ونى ءساتتى تاپسىرىپ وتكەن»، - دەدى ول ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، كوپ جاعدايدا تەستىلەۋ ورتالىقتارى وبلىس ورتالىقتارىندا ورنالاسقان. مىسالى، قىتايمەن شەكارالاس نارىنقول اۋىلىنان الماتى قالاسىنا دەيىن 340، ال وبلىس ورتالىعى تالدىقورعان قالاسىنا دەيىن 550 شاقىرىمنان استام جول ءجۇرۋ كەرەك.
«ودان كەيىنگى اڭگىمەلەسۋ كەزەڭى بويىنشا بىرنەشە ماسەلە بار. وتكەن جىلى 28 مىڭعا جۋىق ىرىكتەۋ بويىنشا كونكۋرس جاريالانسا، وعان 46 مىڭنان استام ازامات قاتىسىپ، ناتيجەسىندە تەك 15 400 ۇمىتكەر مەملەكەتتىك قىزمەتكە ىرىكتەلىپ الىندى. بۇل جەردە دە قولجەتىمدىلىككە قاتىستى سۇراق تۋىندايدى. مىسالى، ماڭعىستاۋلىق جەرلەسىمىز نۇر-سۇلتان قالاسىندا جاريالانعان اڭگىمەلەسۋگە قاتىسۋ ءۇشىن مىڭداعان شاقىرىم قاشىقتىقتى ەڭسەرۋى قاجەت. وسىلايشا، ىرىكتەۋدىڭ ءار كەزەڭىنە قاتىسۋ ءۇشىن كوپتەگەن ازامات جول شىعىنىن، ودان بولەك كۇندەلىكتى جۇمىسىنان سۇرانىپ، بوس ۋاقىتىن ارناۋى كەرەك. ارينە، «ە-قىزمەت» اقپاراتتىق جۇيەسى ارقىلى مەملەكەتتىك قىزمەتكە ىرىكتەۋ پروسەسىنىڭ بارلىق كەزەڭدەرىن اۆتوماتتاندىرۋ، قاشىقتان قاتىسۋ جوعارىدا اتالعان ماسەلەلەردى شەشەتىنى انىق. وسى جۇمىس كەلەسى جىلدىڭ اياعىنا دەيىن اياقتالادى»، - دەدى بەرىك بەركىمبايەۆ.