سونىمەن بىرگە، تاۋ-كەن ونەركاسىبىندەگى كورسەتكىش 0،9%-عا تومەندەگەن.
2022 جىلدىڭ قاڭتار-قاراشا ارالىعىندا ونەركاسىپتەگى ءوندىرىس كولەمى 2021 جىلداعى كەزەڭمەن سالىستىرعاندا 101،4%-عا جەتتى. بۇل تۋرالى Almaty-akshamy.kz يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ حابارلايدى.
بۇل ءوسىم وڭدەۋ (4،2%)، مەتاللۋرگيا (3،9%)، ماشينا جاساۋ (8،9%) جەڭىل ونەركاسىپ (6،9%)، سونداي-اق ءتۇستى مەتالل كەندەرىن ءوندىرۋ سالاسىنداعى (5،9%) ءوندىرىس كولەمىنىڭ ۇلعايۋى ەسەبىنەن بايقالىپ وتىر. سونىمەن بىرگە، تاۋ-كەن ونەركاسىبىندەگى كورسەتكىش 0،9%-عا تومەندەگەن.
بىلتىر يندۋستريا جانە ينفراقۇرىلىمدىق دامۋ مينيسترلىگى ونەركاسىپتەگى سيفرلى تەحنولوگيالاردى ەنگىزۋگە بايلانىستى ىنتالاندىرۋدىڭ تىڭ تەتىكتەرىن قوستى. بۇل ونەركاسىپتىك-يننوۆاسيالىق قىزمەت سۋبەكتىلەرىنىڭ ەڭبەك ونىمدىلىگىن ارتتىرۋعا سەپتىگىن تيگىزۋى ءتيىس.
ونەركاسىپكە مەملەكەتتىك ىنتالاندىرۋ شارالارىن ۇسىنۋ قاعيدالارىنا سايكەس شىعىنداردى وتەۋ يندۋستريا 4.0 تەحنولوگيالارىن ەنگىزۋگە جانە اۆتوماتتاندىرىلعان باسقارۋ جۇيەلەرىن ازىرلەۋگە نەمەسە قولدانىسقا ەنگىزۋگە (ونىڭ ىشىندە، ليسەنزيالىق باعدارلامالىق قامتاماسىز ەتۋدى ساتىپ الۋعا) بەرىلەدى. ءقازىر 6 ونەركاسىپتىك كاسىپورىن IT شەشىمدەرگە جۇمسالعان شىعىنداردىڭ ورنىن تولتىرا الدى.
سونىمەن قاتار، مينيسترلىك ساتىپ الىناتىن جابدىق قۇنىنىڭ 50% (750 ملن تەڭگەدەن اسپايتىن) مولشەرىنە دەيىن تەحنولوگيالىق جابدىقتى جاڭعىرتۋعا ارنالعان ونەركاسىپتىك گرانتتى ۇسىنۋ ارقىلى ءوندىرىس ورىندارىن قولداۋدى جالعاستىرىپ كەلەدى. 2023 جىلى رەسپۋبليكالىق بيۋدجەتتەن اتالعان گرانتتى ۇسىنۋعا 1،6 ملرد تەڭگە قاراستىرىلعان.
بۇعان قوسا، ۆەدومستۆو ونەركاسىپتى قولداۋدىڭ قوسىمشا شارالارى رەتىندە 2023 جىلدا ءبىرقاتار ءىس-شارانى جوسپارلاپ وتىر. ونىڭ ىشىندە، Astana Mining&Metallurgy-2023 (حالىقارالىق تاۋ-كەن مەتاللۋرگيا كونگرەسى) فورۋمى مەن شەتەلدىك دەلەگاتتاردىڭ قاتىسۋىمەن قازاقستان ماشينا جاساۋشىلارىنىڭ XI فورۋمىن وتكىزۋ جوسپارى بار.
Astana Mining&Metallurgy – تاۋ-كەن يندۋسترياسىنداعى اۋقىمدى ءىس-شارالاردىڭ ءبىرى سانالادى. ونىڭ ديالوگ الاڭىندا B2B جانە G2B فورماتىندا جەر قويناۋىن يگەرۋمەن اينالىساتىن ءىرى كومپانيالار مەن قازاقستاننىڭ مەملەكەتتىك قۇرىلىمدارىنىڭ وكىلدەرى كەزدەسىپ، سالالىق كورمە، نەتۆوركينگ جانە «التىن گەفەست» سالالىق بايقاۋى وتكىزىلەدى. جىل سايىن ۇيىمداستىرىلاتىن كونگرەس سالاارالىق ينۆەستيسيالىق بايلانىستى كەڭەيتۋگە، جاڭا كەلىسىمشارتتار جاساۋعا جانە زاماناۋي سىن-قاتەرلەرگە بىرلەسكەن شەشىمدەردى ازىرلەۋگە اسەرىن تيگىزىپ كەلەدى.
ال، قازاقستان ماشينا جاساۋشىلار فورۋمىنىڭ ماڭىزدىلىعى سول، مۇندا اۆتوكولىك وندىرىسىنەن بولەك، ەلىمىزدىڭ وڭدەۋ ونەركاسىبىن دامىتۋ ستراتەگياسى قالىپتاستىرىلىپ، سالالىق كاسىپورىنداردى ارزان باعاداعى شيكىزاتپەن قامتاماسىز ەتۋدىڭ جانە جەرگىلىكتى قامتۋدى دامىتۋدىڭ جاڭا تەتىكتەرى قاراستىرىلادى.
سونىمەن قاتار، بيىل قازاقستاندىق كاسىپورىنداردىڭ ەل اۋماعى مەن رەسەيدە جانە وزبەكستاندا وتكىزىلەتىن «يننوپروم» كورمەسى اياسىنداعى ءتۇرلى اۋقىمدى ءىس-شارالارعا قاتىسۋى جوسپارلانعان.