جالاقىنىڭ ناقتى مولشەرى الەۋمەتتىك اۋدارىمدارمەن راستالادى
1 قاڭتاردان باستاپ جۇكتىلىك جانە بوسانۋ بويىنشا ءبىر رەتتىك ەڭ جوعارى تولەم مولشەرى وسەدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
ءقازىر تابىسى 7 ەڭ تومەنگى جالاقىدان (297 500 تەڭگەدەن جوعارى) اساتىن ايەلدەر 1 124 550 تەڭگە الا الادى (42 500*7*4،2-10%)، جاڭا جىلدان باستاپ ەڭ تومەنگى جالاقى 42 500-دەن 60 000 تەڭگەگە دەيىن كوتەرىلۋىنە بايلانىستى بۇل سوما 1 587 600 تەڭگەگە دەيىن وسەدى (60 000*7*4،2-10%).
ەڭبەك مينيسترلىگىنىڭ باسپا ءسوز قىزمەتى مەملەكەتتىك الەۋمەتتىك ساقتاندىرۋ قورىنان جۇكتىلىككە جانە بوسانۋعا، جاڭا تۋعان بالانى (بالالاردى) اسىراپ الۋعا بايلانىستى تابىسىنان ايىرىلعان جاعدايدا تولەنەتىن الەۋمەتتىك تولەمنىڭ مولشەرى الەۋمەتتىك اۋدارىمدار جۇرگىزىلگەن تابىسقا تىكەلەي بايلانىستى ەكەنىن حابارلادى.
«الەۋمەتتىك اۋدارىمدار ەڭ تومەنگى 1 جالاقىدان (2021 جىلى 42 500 تەڭگە، 2022 جىلدان باستاپ 60 000 تەڭگە) جانە 7 ەڭ تومەنگى جالاقىدان (2021 جىلى 297 500 تەڭگە، 2022 جىلدان باستاپ 420 000 تەڭگە) اسپايتىن كىرىستەن تولەنەدى»، دەپ حابارلادى مينيسترلىك.
مىسالى، ەگەر ايەلدىڭ ءبىر جىل بويى اي سايىن 500 000 تەڭگە كولەمىندە تابىسى بولسا جانە 126 كۇنتىزبەلىك كۇن تولىق مولشەردە جۇكتىلىگى جانە بوسانۋى بويىنشا دەمالىس الاتىن بولسا، وندا تولەم بىلاي ەسەپتەلەدى:
500 000 * 4،2 – 10% = 1 890 000 تگ.
بۇل سوما جۇمىس ىستەيتىن ايەلدەر ءۇشىن جۇكتىلىك جانە بوسانۋ بويىنشا بىررەتتىك تولەمنىڭ ەڭ جوعارى مولشەرىنەن اسادى. وسى سومادان ايەل ەڭ جوعارى ءتيىستى تولەمدى الادى – 2021 جىلى 1 124 550 تەڭگە جانە 2022 جىلى 1 587 600 تەڭگە.
قالعان سومانى (765 450 جانە 302 400 تەڭگە) جەكە ەڭبەك شارتىندا كورسەتىلگەن بولسا، جۇمىس بەرۋشى تولەۋى مۇمكىن.
ەگەر سومانى ەسەپتەۋ كەزىندە ءارتۇرلى جىلدارداعى ايلار قامتىلسا، ەڭ تومەنگى ايلىق جالاقى سول جىلداعى كورسەتكىش بويىنشا ەسەپتەلەدى (2021 جىلى 42 500 تەڭگە جانە 2022 جىلى 60 000 تەڭگە).
اتالعان تولەمنىڭ مولشەرى جۇكتىلىككە جانە بوسانۋعا بايلانىستى دەمالىستى رەسىمدەگەن ايدىڭ الدىنداعى سوڭعى 12 ايدا قورعا الەۋمەتتىك اۋدارىمدار جۇرگىزىلگەن ورتاشا ايلىق تابىستىڭ مولشەرىن ەڭبەككە جارامسىزدىق كۇندەرى سانىنىڭ ءتيىستى كوەففيسيەنتىنە كوبەيتۋ جولىمەن ايقىندالادى ("مىندەتتى الەۋمەتتىك ساقتاندىرۋ تۋرالى" زاڭنىڭ 23-بابىنىڭ 3-تارماعى).
جالاقىنىڭ ناقتى مولشەرى الەۋمەتتىك اۋدارىمدارمەن راستالادى. بۇل ەسەپتەۋ كەزىندە تابىس مولشەرى كورسەتىلگەن كەزەڭدە قورعا تۇسكەن الەۋمەتتىك اۋدارىمدار بويىنشا انىقتالاتىنىن بىلدىرەدى.
ەڭبەك مينيسترلىگى الەۋمەتتىك تولەمنىڭ مولشەرى ءار ادامعا جەكە ەسەپتەلەتىنىن، ونى انىقتاۋ ءۇشىن ورتاشا ايلىق كىرىستى جانە سوڭعى 12 ايدا الەۋمەتتىك اۋدارىمدار جۇرگىزىلگەن ەڭبەككە جارامسىزدىق كۇندەرى سانىنىڭ كوەففيسيەنتىن ارتتىرۋ قاجەت ەكەنىن اتاپ ءوتتى.