دەنساۋلىق ساقتاۋ سالاسىندا 247 مىڭ مەديسينا قىزمەتكەرىنىڭ جالاقىسى ارتتى
2022 جىلى دارىگەرلەردىڭ جالاقىسىن كوتەرۋگە 361 ملرد تەڭگە قارجى بولىنەدى. بۇل جايىندا ق ر پرەمەر-مينيسترىنىڭ ورىنباسارى ەرالى توعجانوۆتىڭ ءماجىلىس دەپۋتاتتارى ساۋالىنا بەرگەن جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەملەكەت باسشىسىنىڭ قازاقستان حالقىنا ارنالعان جولداۋىن جۇزەگە اسىرۋ اياسىندا 2020-2025 جىلدارى مەديسينا قىزمەتكەرلەرىنىڭ جالاقىسىن كەزەڭ-كەزەڭمەن كوتەرۋ جوسپارلانعان»، - دەلىنگەن ۇكىمەت باسشىسى ورىنباسارىنىڭ جاۋابىندا. ۆيسە-پرەمەر جاۋابىنا انىقتاما رەتىندە ۇسىنىلعان دەرەكتەرگە سايكەس، 2021 جىلدىڭ 1 قاڭتارىنان دەنساۋلىق ساقتاۋ سالاسىندا 247 مىڭ مەديسينا قىزمەتكەرىنىڭ جالاقىسى ارتتى. اتاپ ايتقاندا، دارىگەرلەردىڭ جالاقىسى 30 پايىزعا (246،1 مىڭنان 319،9 مىڭ تەڭگەگە) ورتا مەديسينا قىزمەتكەرلەرىنىڭ جالاقىسى 20 پايىزعا (144،6 مڭنان 173،5 مىڭ تەڭگەگە) ۇلعايدى. «2023 جىلعا قاراي مەديسينا قىزمەتكەرلەرىنىڭ جالاقىسىن ەكونوميكاداعى ورتاشا جالاقىعا قاتىستى 2،5 ەسەگە دەيىن ارتتىرۋ جوسپارلانعان»، - دەدى ول.
انىقتامالىق دەرەكتەرگە قاراعاندا، بۇل ماقساتقا 2021 جىلعا – 222،3 ملرد تەڭگە، 2022 جىلعا – 361،7 ملرد تەڭگە، 2023 جىلى 557،4 ملرد تەڭگە كوزدەلگەن.