بۇل جايىندا الەۋمەتتىك مەديسينالىق ساقتاندىرۋ قورىنىڭ باسقارما ءتوراعاسى ايدىن اشۋيەۆ ايتتى.
سپيكەردىڭ سوزىنشە، 2،5 جىل ىشىندە مەديسيناداعى بارلىق پروبلەمالاردى شەشۋ مۇمكىن ەمەس. دەيتۇرعانمەن، ءمامس جۇيەسىنىڭ ارقاسىندا ادامدار بۇرىن تەك اقىلى بولعان قىزمەتتەردى تۇتىنا الادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بيىل جوعارى تەحنولوگيالىق كومەك كولەمى 1،5 ەسە ءوستى. وسى جىلدىڭ 7 ايىندا 12 مىڭنان استام قىمبات وپەراسيالار جاسالدى. وتكەن جىلمەن سالىستىرعاندا ءوسىم 34%. «اڭساعان ءسابي» باعدارلاماسى بويىنشا 7 مىڭ ەكو-راسىمنىڭ 4 مىڭعا جۋىق رەپرودۋكتيۆتى قىزمەتى قارجىلاندىرىلدى. وتكەن جىلدىڭ وسى كەزەڭىمەن سالىستىرعاندا ءوسىم 40% بولدى.
وسىلايشا، ءمامس جۇيەسى سالانى قارجىلاندىرۋ بولىگىندە قولايلى جاعدايلار جاسايدى. ءبىراق ءقازىر مەديسينالىق كومەكتى ۇيىمداستىرۋ، كلينيكالاردىڭ ىشىندەگى مەنەدجمەنت دەڭگەيى، پاسيەنتتەردى دۇرىس باعىتتاۋ ماسەلەلەرى وزەكتى»، - دەدى ايدىن اشۋيەۆ.