2022 جىلدىڭ قاڭتار ايىنان باستاپ ءبىرىنشى سىنىپ وقۋشىلارىنا «سيفرلىق ساۋاتتىلىق» ءپانى ەنگىزىلەدى، دەپ حابارلايدى almaty-akshamy.kz ءبىلىم مينيسترلىگىنە سىلتەمە جاساپ.
بۇعان دەيىن وقۋشىلار ءۇشىنشى سىنىپتان باستاپ «اقپاراتتىق-كوممۋنيكاسيالىق تەحنولوگيالار» ءپانىن وقىعان بولاتىن.
«وقۋ باعدارلاماسى سۇرانىس پەن ۋاقىت تالاپتارىنا سايكەس بولۋى ءتيىس. بۇگىنگى تاڭدا سيفرلىق الەمنىڭ قارقىندى دامىپ جاتقانىن كورىپ وتىرمىز. ءقازىر سمارتفوندار مەن كومپيۋتەرلەردى مەكتەپكە دەيىنگى كىشى جاستاعى بالالار پايدالانىپ جاتادى. سيفرلىق ساۋاتتىلىق وقۋ مەن جازۋ سياقتى نەگىزگى داعدىلاردىڭ بىرىنە اينالىپ كەلەدى. سوندىقتان بالالاردى سيفرلىق ساۋاتتىلىق جانە اقپاراتتىق قاۋىپسىزدىك نەگىزدەرىنە مۇمكىندىگىنشە ەرتەرەك ۇيرەتۋ ماڭىزدى. البەتتە، جاڭا ءپاندى وقىتۋ بارىسىندا بالالاردىڭ جاس ەرەكشەلىكتەرى دە ەسكەرىلەتىن بولادى»، – دەپ اتاپ ءوتتى ق ر بعم مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا.
سونىمەن قاتار 4-سىنىپقا ارنالعان «اقپاراتتىق-كوممۋنيكاسيالىق تەحنولوگيالار» جانە 5-11 سىنىپتارعا ارنالعان «ينفورماتيكا» پاندەرى بويىنشا وقۋ باعدارلامالارى قايتا قارالدى. جاڭاشىلدىقتار بالالاردىڭ اقپاراتتىق تەحنولوگيالار سالاسىندا ساپالى ءبىلىم الۋىنا باعىتتالعان.
مەكتەپ باعدارلاماسى شەڭبەرىندە ەڭ تانىمال Python باعدارلامالاۋ ءتىلى وقىتىلادى. سونداي-اق 5-9 سىنىپ وقۋشىلارى 3D-مودەلدەۋ مەن 3D-پرينتينگكە بويىنشا ءبىلىم الادى. 10-11 سىنىپتارداعى
«ينفورماتيكا» ءپانى بويىنشا ۇلگىلىك وقۋ باعدارلاماسى IT-سالاسىنىڭ زاماناۋي دامۋ ۇردىستەرىن ەسكەرە وتىرىپ ازىرلەنگەن. وقىتۋ باعدارلاماسىندا IT-STARTUP، ۆيرتۋالدى جانە تولىقتىرىلعان شىنايىلىق، جاساندى ينتەللەكت، ءموبيلدى قوسىمشالاردى ازىرلەۋ، BigData جانە تاعى باسقا تاقىرىپتار بار.
سونداي-اق بارلىق سىنىپتىڭ وقۋ باعدارلامالارىنا ينتەرنەت جەلىسىندەگى قاۋىپسىزدىك ەرەجەلەرى، اۆتورلىق قۇقىق تۋرالى تاقىرىپتار ەنگىزىلگەن.