2021 جىلدىڭ باسىنان بەرى «ەڭبەك» مەملەكەتتىك باعدارلاماسىنا 286 مىڭعا جۋىق ادام قاتىستى
اعىمداعى جىلعى 1 ماۋسىمداعى جاعداي بويىنشا، 285،8 مىڭ ادام ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسىنىڭ (بۇدان ءارى – «ەڭبەك» مەملەكەتتىك باعدارلاماسى) قاتىسۋشىلارى بولدى، دەپ حابارلادى Almaty-akshamy.kz ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارىنا سىلتەمە جاساپ.
210،1 مىڭ ادام جۇمىسقا ورنالاستىرىلدى، ونىڭ 107،1 مىڭى – تۇراقتى جۇمىسقا.
باعدارلامانىڭ ءبىرىنشى باعىتى اياسىندا قىسقا مەرزىمدى كۋرستارعا 7،4 مىڭ ادام جىبەرىلدى.
ءوز ءىسىن اشۋ ءۇشىن 2 مىڭنان استام ادام جەڭىلدىكتى ميكروكرەديتتەر، ال 11،1 مىڭى قايتارىمسىز مەملەكەتتىك گرانتتار الدى.
سۋبسيديالاناتىن جۇمىس ورىندارىنا 111،7 مىڭ ادام جۇمىسقا ورنالاستىرىلدى، ونىڭ ىشىندە: الەۋمەتتىك جۇمىس ورىندارىنا 14،3 مىڭ ادام؛ جاستار پراكتيكاسىنا – 9،9 مىڭ ادام؛ قوعامدىق جۇمىستارعا – 87،5 مىڭ ادام.
ەڭبەك رەسۋرستارىنىڭ ۇتقىرلىعى شەڭبەرىندە 745 وتباسى نەمەسە 2 383 ادام قونىس اۋداردى، ونىڭ ىشىندە 1 072 ادام ەڭبەككە قابىلەتتى جاستا. ونىڭ ىشىندە 701 ادام جاڭا تۇرعىلىقتى جەرىندە تۇراقتى جۇمىس ورىندارىنا ورنالاستىرىلدى جانە 40 ادام كاسىپكەرلىك قىزمەتپەن اينالىسادى.
ەستەرىڭىزگە سالا كەتەيىك، 2020 جىلى «ەڭبەك» مەملەكەتتىك باعدارلاماسىنا 649 مىڭ ادام قاتىستى. 437،3 مىڭ ادام جۇمىسقا ورنالاستىرىلدى، ونىڭ 319،2 مىڭى تۇراقتى جۇمىسقا تۇردى. جاپپاي كاسىپكەرلىكتى دامىتۋعا 12،7 مىڭ ميكروكرەديت جانە جاڭا بيزنەس-يدەيالاردى ىسكە اسىرۋعا 44،9 مىڭ مەملەكەتتىك قايتارىمسىز گرانت بەرىلدى.
قىسقا مەرزىمدى وقىتۋ كۋرستارىنا 18،7 مىڭ ادام جىبەرىلدى، ال تجكب ۇيىمدارىندا وقىتۋمەن 18،4 مىڭ ادام قامتىلدى.
بۇدان باسقا، ەڭبەك رەسۋرستارىنىڭ ۇتقىرلىعىن ارتتىرۋ شەڭبەرىندە جۇمىس كۇشى ارتىق وڭىرلەردەن قۇرامىندا 5،8 مىڭ ادامى بار 1،8 مىڭ وتباسى قونىس اۋداردى.