ەكولوگيالىق احۋالدى جاقسارتۋ ءۇشىن وزبەكستان استاناسىندا اۆتوكولىكتەرگە قاتىستى ءبىرقاتار شەكتەۋ ەنگىزۋ ۇسىنىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
وزبەكستان ەكولوگيا مينيسترلىگىنىڭ مالىمەتىنشە، تاشكەنتتەگى اۋانىڭ لاستانۋىنا اعاشتاردى زاڭسىز كەسۋ، كولىكتەر بولەتىن زياندى گازدار جانە كومىر مەن مازۋت ءتۇتىنى سەبەپ.
«بۇگىندە ءىرى قالالاردا، ونىڭ ىشىندە تاشكەنتتە اتموسفەرالىق اۋانىڭ لاستانۋى ەلەكتر جانە جىلۋ ەنەرگياسى كوزدەرى، اۆتوكولىك شىعارىندىلارى كولەمىنىڭ ۇلعايۋىمەن بايلانىستى. ولاردىڭ جاعىمسىز اسەرىن ازايتۋ ماقساتىندا ءتيىستى شارالار ازىرلەۋ قاجەت»، - دەپ ءمالىم ەتتى ۆەدومستۆودان.
وسىعان بايلانىستى قۇزىرلى ورگان تاشكەنت قالاسىندا كەلەسى شەكتەۋ شارالارىن ەنگىزۋدى ۇسىنىپ وتىر:
- «ەۋرو-4» ستاندارتىنا ساي كەلمەيتىن جانارمايدى (اي-80 ماركالى جانارماي) پايدالانۋعا تىيىم سالۋ؛
- كەپتەلىس بولاتىن ۋاقىتتاردا جۇك كولىكتەرىنىڭ قوزعالىسىنا شەكتەۋ (07:00-دەن 10:00-گە دەيىن جانە 17:00-دەن 20:00-گە دەيىن) قويۋ؛
- 2010 جىلعا دەيىن شىعارىلعان بارلىق اۆتوكولىك قۇرالىنىڭ قوزعالىسىنا تىيىم سالۋ. ەلەكتروموبيلدەرگە كوشكەن كولىك يەلەرىنە جەڭىلدىكتەر، پرەفەرەنسيالار مەن سۋبسيديالار بەرۋ؛
- ماگيسترالدارداعى كەپتەلىستى ازايتۋ جانە اۆتوموبيل قوزعالىسىن وڭتايلاندىرۋ ءۇشىن تاجىريبە رەتىندە كولىكتەردى «تاق جانە جۇپ» كۇندەرى جۇرگىزۋ ەرەجەسىن ەنگىزۋ؛
- قالانىڭ ورتالىق كوشەلەرىندە اۆتوكولىكتەن بوس ايماقتاردى ۇيىمداستىرۋ؛
– ءتيىستى ينفراقۇرىلىمدى قۇرا وتىرىپ، قوعامدىق كولىكتى بالامالى وتىن تۇرلەرىنە، ياعني ەلەكتر جانە گازعا اۋىستىرۋ.
سونداي-اق كاسىپورىندار مەن جىلۋ ورتالىقتارىندا كومىر مەن مازۋتتى پايدالانۋعا تىيىم سالۋ ۇسىنىلادى. ۆەدومستۆو وبەكتىلەردىڭ بارلىق تۇرلەرىن (الەۋمەتتىك جانە مەملەكەتتىك ماڭىزى بار وبەكتىلەردەن باسقا) سالۋعا موراتوريي جاريالاۋ، تاشكەنتتىڭ اينالاسىندا جاساندى سۋ ايدىندارى مەن جاسىل بەلدەۋ قۇرۋ، سونداي-اق اۋا ساپاسىنىڭ كورسەتكىشتەرى جاريالاناتىن مونيتورلار ورناتۋدى ورىندى دەپ ەسەپتەيدى.