ولار قارۋلى كۇشتەر مەن ۇلتتىق ۇلان، شەكارا قىزمەتى جانە توتەنشە جاعدايلار مينيسترلىگىنىڭ بولىمدەرىنە قابىلدانادى.
اسكەرگە بارعان جاستار ءۇشىن جوعارى وقۋ ورنىندا تەگىن ءبىلىم الۋعا مۇمكىندىك بار. ەلىمىزدىڭ بارلىق وڭىرلەرىندە 18 بەن 27 جاس ارالىعىنداعى ازاماتتاردى مەرزىمدى اسكەري قىزمەتكە شاقىرۋ باستالدى. جوسپارعا سايكەس كوكتەمگى ناۋقان اياسىندا 20 000 بوزبالا اسكەري بولىمدەرگە جونەلتىلەدى، دەپ حابارلايدى Almaty-akshamy.kz 24.kz-كە سىلتەمە جاساپ.
قازىرگى تاڭدا ەل بويىنشا 195 اۋماقتىق كوميسسيا اسكەري قىزمەتكە شاقىرۋدى جۇزەگە اسىرىپ جاتىر.
«20 مىڭعا جۋىق ءبىزدىڭ جاس ساربازىمىز ساپقا تۇرعىزىلاتىن بولادى. ونىڭ ىشىندە قارۋلى كۇشتەرگە 9 مىڭعا جاقىن، شەكارا قىزمەتىنە 6 مىڭعا جۋىق، ۇلتتىق ۇلان اسكەري بولىمدەرىنە 9 مىڭعا ءبىزدىڭ ساربازدارىمىز ساپقا تۇرعىزىلاتىن بولادى»، - دەيدى ق ر قك باس شتابى ۇيىمداستىرۋ-جۇمىلدىرۋ دەپارتامەنتى باستىعىنىڭ ورىنباسارى رۋسلان وماروۆ.
ساربازدارعا اسكەري قىزمەتىن وتكەرۋ كەزەڭىندە كرەديتتىك دەمالىس بەرىلەدى. شاقىرۋ ناۋقانى بارىسىندا جينالعان بانكتىك قارىزدار مەن ميكروكرەديتتەر تۋرالى مالىمەتتەر بىردەن قارجى نارىعىن رەتتەۋ جانە دامىتۋ اگەنتتىگىنە جىبەرىلەدى. وسى دەرەكتەردىڭ نەگىزىندە كرەديتورلار نەگىزگى بورىش، سىياقى بويىنشا تولەمدەردى كەيىنگە قالدىرادى.
اسكەري قىزمەتتىڭ تارتىمدىلىعىن ارتتىرۋ ماقساتىندا اسكەري قىزمەت وتكەرگەندەرگە جوعارى وقۋ ورىندارىنا تۇسۋگە جەڭىلدىكتەر بەرىلەدى. ول ءۇشىن 45 جەتەكشى جوعارى وقۋ ورنىنىڭ رەكتورلارىمەن مەموراندۋمعا قول قويىلدى.
«مەرزىمدى اسكەري قىزمەت وتكەرگەن ءبىزدىڭ ازاماتتارىمىز ۇبت-عا كىرمەي-اق، جوو-عا ءتۇسۋ مۇمكىندىگى بەرىلگەن. بىلتىر اسكەري قىزمەتىن وتەگەن ازاماتتارىمىزدىڭ 700-گە جاقىنى قازىرگى تاڭدا جوو-دا وقىپ جاتىر. قارجى رەتتەۋ اگەنتتىگىمەن جاسالعان مەموراندۋمنىڭ ارقاسىندا ءبىزدىڭ مەرزىمدى اسكەري قىزمەتكەر شاقىرىلعان ازاماتتارىمىزعا كرەديتتىك دەمالىستار بەرىلىپ وتىر»، - دەيدى ق ر قك باس شتابى ۇيىمداستىرۋ-جۇمىلدىرۋ دەپارتامەنتى باستىعىنىڭ ورىنباسارى رۋسلان وماروۆ.
اسكەري بولىمدەرگە جونەلتىلگەن ساربازداردىڭ الدى بۇگىندە اسكەري انت قابىلداپ، وتان قورعاۋشىلاردىڭ قاتارىنا قوسىلدى.
«كەلگەنىمىزگە بۇگىن 28 كۇن بولدى. ەڭ ءبىرىنشى بولىپ ءبىز كەلدىك. ەلدىڭ، ءۇيدىڭ، وتاننىڭ ءقادىرىن تۇسىندىك جانە دە ءتارتىپ، «تارتىپكە باعىنعان قۇل بولمايدى» دەگەندى تۇسىندىك. ىشتە ءبارىنىڭ جاعدايى بىردەي، كوڭىلىم تولادى»، - دەيدى قاتارداعى جاۋىنگەر داۋلەت بولاتباي ۇلى.
كوكتەمگى اسكەرگە شاقىرۋ ناۋقانى ماۋسىم ايىنا دەيىن جالعاسادى. ايتا كەتەلىك، اسكەرگە شاقىرىلعانداردىڭ تىزىمىندە زاپاستاعى وفيسەرلەر دە بار. ولار جەتىسپەيتەن ماماندار قاتارىن تولىقتىراتىن بولادى.